Lapolis pe fer lanket dan en lensidan ki ti ganny raporte kordgard Beau Vallon yerswar ver 6er 40 diswar apre ki en zonm ti ganny atake e vole dan son transpor Belombre. Sa ataker ti mord sa zonm lo son lebra vole apre taye. 

Sete en zofisye lapolis ki pa ti pe travay a sa letan ki ti entersepte sa sispe tar yerswar dan zanmerant bazar Belombre. I ti aret sa sispe avek led sivilyen prezan e remet avek kordgard Beau Vallon, lapolis in reisi rekiper serten propriyete ki sa sispe tin vole pli boner e pe rod sa lot akonplis frer sa sispe ki aze 30an sorti Belombre. 

Sa 2 Sispe zonm tin osi enplike dan en lensidan vol an servan vyolans kot en laboutik Belombre pli boner sa semenn.

Lapolis pe raport lo 2 lanmor kin arive ozordi bomaten kot en lakaz Reef Estate dan distrik Anse Aux Pins. Sa i en Papa 92an ek son garson 46an.

Premye rapor ti ganny fer ver 7er 30 bomaten apre ki sa papa tin ganny vwar pa pe reazir zofisye medikal ti reponn lapel lo teren.Tes Covid 19 ti ganny fer sirplas in demontre ki sa msye ti pozitiv pou covid 19. Plitar ver 10er bomaten en 2yenm rapor ti ganny fer kordgard Anse Aux Pins kot son piti 46an ki ti osi reste avek li tin osi ganny vwar pa pe reazir dan son lasanm. Tou lede dimoun ti ganny sertifye mor lo scene.

Lanket ki deza an progre pa pe demontre okenn akt ou sir malisye dan lanmor sa papa ek son piti. Antretan lapolis pe esper rapor rezilta letopsi pou determin lakoz ekzakt zot lanmor.

Sa i en alegasyon kot en zonm sispe ki ti an detasyon lapolis dan en ka vol an servan vyolans ki ti arive Belombre Zedi swar pe refer sorti ki in ganny bate avek serten zofisye. Sa lot  lensidan i annan rapor ki en zofisye in kraz vit en loto pandan en spot check kin arive ozordi apremidi Hilltop Glacis.

Lapolis in komans en lanket dan toulede ka.

Lapolis in raporte ki 3 sispe in ganny arete e pe pas atraver bann prosedir lanket an relasyon avek en ka kot en sonm ant 15 a 20 mil roupi in raporte ganny vole dan en laboutik Bel Ombre yer swar.

Sa 3 sispe zonm kin ganny arete I aze ant 27 a 34 an e tou le 3 i zabitan Bel Ombre menm.

Lanket dan sa ka I an progre.

Lapolis I oule enform manm piblik sirtou zabitan Baie Lazare ki son biro baze kot Sant kominoter e ladministrasyon distrik pou fermen apartir 7 er diswar demen vandredi le 7 e pou reouver pou servis lendi bomaten le 10 Septanm.

Pandan letan ki sa biro pou fermen, dimoun ki bezwen lasistans pou bezwen telefonn sant Komann anvil oubyen kordgard Anse Royale.

Lenkonvenyans ki sa I kapab koze nou byen regrete.

Lapolis pe fer lanket dan 2 ka separe kot dife in ganny mete entansyonnelman dan 2 diferan landwa Point Aux Sel tar yerswar.

Lapolis ti ganny alerte lo sa lensidan ver 10:58 diswar ki ti annan dife dan en platansyon Bannann obor semen grann rout pa lwen avek en laboutik e letan ki bann zofisye tin reponn lapel lo sa scene zot ti ganny alerte ki I annan en lot pe pran derye lasapel pa lwen avek kot sa enn premye.

Zofisye lazans servis tenny dife ek sovtaz sorti stasyon Anse Boileau ti osi bezwen enterveni pou tenny sa 2 dife. Swivan sa 2 lensidan, Lapolis pe fortman kondann bann tel aksyon ki pe ganny fer avek move lentansyon e pe demann okenn manm piblik ki annan lenformasyon krebid lo sa de lensidan pou kontakte CID Anse Royale lo 4372050 ou sant komann lapolis lo 4288000.

Lapolis in raporte ki Manuel Antoine Freminot, en zonm dan son 30an anmontan e ki reste Anse a la Mouche in ganny trouve koupab e ganny en santans 8 an prizon pour lofans omisid envolonter (manslaughter). Freminot in kondannen dan ka lanmor Catherine Moustache ki ti annan 51an letan ki son lekor ti ganny dekouver dan lanmer Anse a La Mouche menm dan zanmerant Anchor Café le 23 Mars 2019.

Apard son 8 an prizon, Ziz ki ti pe ekout sa ka in egalman enpoz en lanmann 125,000 roupi lo Freminot dan ki 2 zanfan son viktim I ganny sakenn 50,000 roupi koman konpansasyon. Manuel Antoine Freminot ti ganny trouve koupab e kondannen le 18 Zilyet.

Ziz ti pas santans lo Freminot le 29 Septanm 2022.

En garson 18an ek en zonm 29an toulde sorti Praslin in ozordi bomaten formelman ganny sarze devan lakour Mazistra Praslin pou lofans Vol. Sa ti ganny raporte arive kot en letablisman touristik lo Praslin menm tou resaman.

Sa 2 akize in ganny large lo serten kondisyon tel ki siryn en " Bail bond " 15mil roupi, siryn liv lakour toule Lendi ek Vandredi, pa repet okenn lofans, pa enterfer avek temwen dan sa ka. Mazistra in osi enpoz en restriksyon mouvman lo toule 2 akize ki komans 7er diswar ziska 6er bomaten. Toulde 2 akize pou aprezan repas devan menm lakour le 24 Oktob 2022. 

Departman Lapolis

Lekor Berguitta Alphonse 32an i ganny dekouver flote dan lanmer Anse Royale dan zanmerant en letablisman touristik pa lwen avek kordgard Anse Royale.

Lapolis ti ganny alerte lo sa lensidan ver 5:50 bomaten sete en viziter msye ki ti pe tir portre lo lans a sa letan ki ti vwar en lekor pe flote dan delo sale deswit i ti alert zofisye lapolis lo sa sitiasyon. Sete bann zofisye lapolis ki ti retir lekor sa madanm dan delo sale e met ater lo lans pou swen medikal. Plitar sa madanm ti ganny sertifye mor sirplas. Lanket ki deza an progre pa pe demontre okenn siryn ou akt malisye dan lanmor sa madanm.

Departman Lapolis

Lapolis in raporte ki sa garson 23 an ki ti ganny arete yer apremidi koman sispe dan lanmor Samuel Cousin aze 27 an e nonpa 22 an parey ti anonse yer in pas devan lakour Siprenm  ozordi e ganny rimann ziska le 10 Oktob zour ki I pou repas ankour.