1 zonm 32 an e en madanm 27an toulede sorti dan distrik St Louis in ganny arete e pe detenir koman sispe dan en ka kot en zonm 25an, Hubert Mothe ki osi sorti dan distrik St Louis, ti ganny deklare mor ver 9: 30 diswar, apre ki ti I tin ganny anmennen kot swen dirzans kot Lopital Sesel an rezilta blesir ki I tin resevwar lo parti son lekor dan en lensidan St Louis.

Lapolis ti ganny alerte lo sa lensidans ver 9:15 yerswar, letopsi fer lo lekor Hubert Mothe ozordi  I demontre ki in mor par en kout kouto fatal dan son lestoman.

Lapolis pe kontinnyen avek son lanket dan sa ka kot sa 2 sispe i espekte ganny anmenn ankour Lendi.

Lapolis in konmans en lanket dan en ka kin arive dan distrik St Louis kot en garson 25 an sorti dan distrik St Louis in ganny sertifye mor lopital Sesel swivan en blesir grav ki in resevwar lo en parti son lekor plis detay dan en prosen kominike.

Sa 2 zonm aze 42 an e 47 an toulede sorti Nagon Estate dan distrik Point Larue ki ti sispe dan sa ka Akt avek lentansyon pou koz dimal grav en dimoun  in ganny anmenn devan lakour Mazistra ozordi apremidi kot zot in ganny rimann pou 14 zour sa 2 sispe pou re ganny anmenn ankour le 23 Fevriye 2022.

Apre ki 4 zonm ti ganny arete e plitar ganny sarze dan lanmor Rupert Appasamy arive an Septanm lannen pase, Lapolis in yer Mardi aret en 5yenm sispe dan sa ka. Sa I en zonm 26 an sorti Bel Air ki lapolis ti pe rode an koneksyon avek disparisyon e lanmor evantyel Appasamy. Sa sispe ki tin kit pei ti ganny arete yer lo son retour Sesel.

Appasamy aze 37 an ki ti reste Roche Caiman ti ganny raporte manke avek lapolis par manm son fanmiy le 14  Septanm apre ki zot ti dernyen fwa war li vivan le 11 Septanm.

2 premye sispe zonm dan sa ka ti ganny arete le 21 Septanm e 2 zour plitar lekor Appasamy ti ganny dekouver kot I tin ganny touye e antere kot en vye lakaz inabite Bougainville.

Sa zonm 26 an kin ganny arete yer in ganny anmenn ankour ozordi apremidi kot in ganny large lo serten kondisyon en “Bail” 100mil roupi, raport kordgard santral toulezour pou vin sir liv, remet tou son bann dokiman vwayaz avek lakour e pou pa enterfer avek temwen dan sa ka.

Ou ava apel ki sa ka mert pou komans ganny ekoute par lakour Siprenm an Me sa lannen.

Steven, Ruggie Marie aze 34 an sorti Baie Lazare  pran kontak avek ou fanmiy irzan oubyen raport kot okenn stasyon lapolis. Steven in kit lakour kot i ti pe reste  Anse Gaulette , Baie Lazare  depi le 07 Fevriye 2022 ziska prezan person pa konnen kot i ete.

Lapolis pe raporte ki in reisi etablir idantite sa zonm, prezimen pann ki son lekor ti ganny dekouver yer Les Cannelles.

Kontakt in ganny fer avek serten manm pli pros son fanmiy pou bann formalite neseser e son idantite ava ganny devwale plitar. Lanket pe sepandan kontinnyen anatandan rapor rezilta letopsi pou etablir ekzakt lakoz osibyen ki posibilite sirkonstans otour lanmor sa msye.

Lapolis I oule profite pou remersi manm piblik kin kontakte e ofer zot lasistans an relasyon avek sa ka ziska prezan.

Lapolis pe ankor ennfwa lans lapel pou led avek idantifikasyon lekor sa msye, dekouver prezimen pann Les Cannelles dan zanmerant Wellness Centre yer ver milye lazournen.

Apard lenformasyon fer sorti par lapolis yer dan son kominike, osi dekouver lo sa “scene” Les Cannelles yer ti  en pti sak ver 3 roupi dan ki ti annan en triko ble pal, en kannson kaki demi bwa avek pos dan de kote osibyen ki en pti meter rouz ki servi pou teste voltaz kouran dan bann aytenm elektronik.

Lapolis pe demann nenport dimoun ki kwar I kapab asiste pou idantifye sa zonm e dimoun ki annan lenformasyon kredib ki kapab ed li dan son lanket pou sil vouple telefonn son Sant Komann baze Victoria, kordgard Anse Royale oubyen CID.

 Lapolis pe egalman kondann sirkilasyon portre  sa zonm lo rezo sosyal  sirtou dan leta ki son lekor I ete. I pe ankor ennfwa demann manm piblik pou evit sa bann sirkilasyon e pou demontre enpe plis resposabilite moral osibyen ki respe pou lekor mor fanmiy zot kanmarad.