Diferan younit e seksyon dan lapolis ti zwenn ansanm dan en loperasyon spesyal kin fer osi yer dan rezyon Point Aux Sel, Anse Royale, Mont Plasir, Les Canelles, Quatre Borne, Takamaka, Anse Gaulette Baie Lazare, Anse Boileau, Grand Anse Mahe, Port Launay e Port Glaud

Sa loperasyon in target plizyer kalite lofans ki pe arive  dan sa bann landwa kot aktivite ilegal pe ganny fer e pou osi asir sekirite lo larout piblik. Dan sa bann loperasyon lapolis in osi fer lafouy lo plizyer dimoun,  ghetto e dan bann transpor plizyer dimoun in ganny arete pou sa bann lofans swivan.

* An posesyon drog ilegal

*Konsonmasyon lalkol dan landwa piblik

*konsonmasyon lalkol dan transpor lo larout piblik

E osi serten sispe ki ti ganny bezwen dan sertan ka in ganny arete.

Lapolis pou kontinyelman ranforsi son prezan dan sa bann landwa a nenport moman pou fer sir ki lord i ganny mete e ki kominote i santi zot pli an sekirite.

Manm piblik pe ganny ankouraze pou touzour raport bann aktivite ilegal e kriminel ki pe arive dan zot kominote atrave bann platform lapolis oubyen kontakte 133 nou lanir konfidansyel.

Diferan younit e seksyon dan lapolis ti zwenn ansanm dan en loperasyon spesyal kin fer yer dan rezyon Perseverance, Anse Etoile, La Gogue, Maldives, La Retrait, North East Point, Glacis, Beau Vallon, Belombre, St Louis e rezyon lavil.

Sa loperasyon in target plizyer kalite lofans ki pe arive dan sa bann landwa kot aktivite ilegal pe ganny fer e pou osi asir sekirite lo larout piblik. Dan sa bann loperasyon lapolis in osi fer lafouy lo plizyer dimoun, dan serten lakaz, ghetto e dan bann transpor plizyer dimoun in ganny arete pou sa bann lofans swivan.

* An posesyon drog ilegal

*An posesyon serten zouti ofansiv

*Enterfer avek louvraz lapolis

* Dray anba lenflians lalkol ki parlao limit ki lalwa i preskir 35ug/100ml

*Konsonmasyon lalkol dan landwa piblik

*konsonmasyon lalkol dan transpor lo larout piblik

*Servi en transpor lo larout piblik san en lasirans e patant ki valid

*Mont bisiklet lo larout piblik san en patant

E osi serten sispe ki ti ganny bezwen dan sertan ka in ganny arete.

Lapolis I oule lans lapel avek manm piblik ki i en lofans konsonm lalkol dan landwa piblik espesyalman bann lenfrastriktir parey Bazar, Bus stop sirtou dan rezyon Belombre kot bokou sa bann aktivite pe ganny deroule koman en routin. Lapolis pou kontinyelman ranforsi son prezan dan sa bann landwa a nenport moman pou fer sir ki lord i ganny mete e ki kominote i santi zot pli an sekirite.

Manm piblik pe ganny ankouraze pou touzour raport bann aktivite ilegal e kriminel ki pe arive dan zot kominote atrave bann platform lapolis oubyen kontakte 133 nou lanir konfidansyel.

En skipper zonm aze 67an sorti Anse Royale in ganny arete e pe deteni pou lofans Manivre en bato anba lenflians lalkol e pou anpese ki zofisye lapolis i fer son travay pandan letan ki i ti pe ganny entersepte.

Lapolis Lamarin ti ganny alerte ver 10er 35 bomaten ki ti annan en bato " Landing Craft " ki ti pe fer direksyon Nor Mahe avek 2 dimoun abor sa i en skipper ek son " Crew". Sa skipper  ti prezimen anba lenflians lalkol apre ki i tin ganny vwar pli boner dan zanmerant Marine Charter kot i ti pe konport li dan en fason dezordonnen.

Deswit Lapolis Lamarin asiste par  gard lakot Sesel ti lans en loperasyon kot zot ti reisi entersepte sa bato dan zanmerant Lilo Glacis. Abor sa bato skipper ki ti tre rezistan avek bann zofisye lapolis ti anpese ki sa bann zofisye i kapab fer zot travay. I ti ganny arete e anmenn kot baz Lapolis Lamarine Bois De Rose. Tes lalkol ki ti fer lo sa skipper in demontre ki nivo lalkol ti tre o lapolis in komans en lanket dan sa enn ka e pe tret li tre serye.

Lapolis pe averti bann skipper pou pran plis zot responsabilite lo lanmer anski konsern konsonmasyon lalkol ki kapab koz en aksidan grav ou fatalite par bann aksyon neglizans.

Lapolis in raporte ki en madanm 53 an in fizikman ganny atake avek gran kouto dan son lakaz ozordi bomaten dan distrik Anse Aux Pins. Rapor ti ganny fer stasyon lapolis Anse Aux Pins ver 9er bomaten. Swivan sa lensidan serten sonm larzan in ganny vole osi  byen ki en telefonn portab. Lapolis pe demann okenn dimoun ki annan lenformasyon kredib lo sa lensidan pou kontake lofis CID  Anse Aux Pins ou nou sant komann lo 4288000 ou 133.

Jeannine Jouanneau  aze 49 an ki reste La Passe La Digue, sil  vouple kontakte manm ou fanmiy oubyen kordgard La Digue irzan.

Nenport dimoun kin trouv oubyen konnen kote  Jeannine Joanneau I ete sil vouple kontakte kordgard pli pre irzan

Lapolis in etablir e pe konfirmen ki portre sa zonm osibyen ki sa portre sa loto ki pe ganny sirkile lo rezo sosyal pa sispe dan lensidan asosye avek  ka sa pti ganrson 11 an sorti Roche Caiman ki  lanket dan son ka I ankor pe kontinnyen. Lapolis  pe alor demann sa ki responsab pou sa bann sirkilasyon pou aret fer li sil vouple.

Lapolis pe ankor enn fwa demann manm piblik pou evite fer bann alegasyon an servan portre, video e menm komanter ki pa fonde an relasyon avek ka ki anba lenvestigasyon.

Sa ki lapolis pe parkont ankouraz manm piblik pou fer, se pour kontake lofis CID si zot annan lenformasyon kredib an relasyon avek nenport ka ki I pe fer lanket ladan.

Lapolis pe konfirmen ki depi yer tar apremidi in komans lanket dan en ka swivan rapor ki en pti garson 11 an in ganny pran par en zonm dan en loto nwanr deor baro kot lekol Primer Plaisance. 

Sa pti garson ki reste Roche Caiman  ti ganny sans sove apre ki sa drayver tin arete, debarke e kit li tousel dan loto parlao dan semen legliz Cascade. 

Rapor sa lensidan ti fer Kordgard Mont Fleuri ver 4:50 par tantin sa pti garson ki tin war li tousel lo grann rout Cascade e apre tann son zistwar.

Pandan ki i pe fer son lanket pou rod sispe enplike dan sa lensidan, Lapolis pe dekouraz bann post lo rezo sosyal ki montre  portre zot kamarad, video, oubyen fer komanter anreferans avek sa ka e osi lezot ka ki kapab afekte son lanket.

Dimoun ki annan lenformasyon kredib an relasyon avek sa enn ka pe plito ganny demande pou kontakte biro  CID irzan.

Dan menm lalinny lapolis pe tret serye alegasyon ki I annan 3 transpor avek dimoun maske ladan ki pe fer letour lavil dan milye lannwit e pran dimoun pou al koman garanti aletranze pou zot bann tranzaksyon drog. Ziska prezan lapolis pe konfirmen ki in napa rapor formel dimoun manke pandan sa bann dernyen zour, e pe demann nenport endividi ki kapab konfirm sa alegasyon  pou kontake biro CID irzan.

Lapolis I garanti konfidansyalite e idantite sa ki fourni lenformasyon.

Finalman Ianket e  rapor medikal dan lanmor sa 2 msye Laporte, papa ek son garson ki ti mor se zot Reef Estate Sanmdi bomaten in demontre ki napa akt malisye dan zot lanmor.

Sete manm lafanmiy ki reste ansanm avek zot ki ti raport lensidan lanmor zot pros avek  lapolis.

En garson 14an sorti Port Glaud in admit D'offay ward lopital Sesel anrezilta en aksidan Bisiklet yerswar Port Glaud.Son kondisyon in ganny dekrir koman stab.

Lapolis ti ganny alerte lo sa aksidan ver 6er 15. Sa garson ansanm avek en group manmay ki ti pe mont bisiklet sorti dan direksyon lo Montany Fore Noire Port Glaud pe desann dan desant ver borlanmer avek vites letan ki i ti perdi kontrol son bisiklet e al bat dan en miray kot en lakaz. Sa garson ti answit ganny transporte par lanbilans kot sant lasante Anse Boileau pou premye swen.

Lapolis pe avertir bann paran swivan serten konplent ki noun resevwar kot sa group manmay pe fer vites dan desant Port Glaud preski toulezour. Sa ki responsab pe osi ganny averti ki aksyon neseser pou ganny pran kont zot ki pe koz serten nwizans e osi neglizans lo larout piblik ki poz en danze pou lezot dimoun.

Le 16 Septanm 2022 Ziz lakour siprenm; Mohan Burhan in fer lord final dan en ka ki Unit ki responsab pour fer lanket dan krim finansyel dan Lapolis Sesel (FCIU) ti anmenn devan son lakour an Zilyet 2020. 

Sa Unit i raporte ki sa ka i konsern en bato lapes Iranyen (dhow)ki zot ti sezi an 2020 apre ki sa menm bato ti ganny servi pou transport drog kontrole tel koman 784.6 granm opium e 97,945. 1 granm heroin dan lanmer sesel. 

Sa Unit i eksplike ki sa bann dimoun a bor sa bato, en group Iranyen ti ganny akite par lakour dapel sesel lo en baz teknikalite. Swivan sa FCIU ti anmenn en ka anba lalwa “Proceeds of Crime Civil Confiscation Act” (POCCCA) pour sezi sa bato ki a sa letan ti vo ant 500 mil a 600 mil roupi sesel.

Sa Unit i eksplike ki swivan en batay legal vreman long, avek lasistans Biro Atorni Zeneral, zot in reisi ganny lord final dan faver gouvernman e ki la sa bato i aprezan vin propriete leta.

En zonm Brazilian aze 26 ans, ki ti ariv Sesel lo en vol Emirate sorti Dubai, le 24 September 2022 bomaten e ganny entersepte par zofisye ladrwann, imigrasyon ek lapolis in formelman ganny sarze ozordi bomaten devan lakour siprenm pour lofans lenportatsyon plis ki 5 kilo Cocaine ki en drog kontrole.

Sa akize pe reste lo rimann anba detansyon Lapolis pou ankor 14 zour avan ki I repas ankor ankour.