Lapolis pe raporte ki ankor 3 zonm, sispe dan lensidan kas batiman e vole ki ti arive pandan wikenn kot stasyon petrol Ile Du Port in ganny anmenn ankour ozordi kot zot in ganny rimann pou repas ankour le 3 May ansanm avek sa premye sispe  ki ti ganny rimann yer.

 Sa 3 sispe ki sorti Mont Buxton, La Gogue e vilaz Quincy ti ganny arête yer pandan lazournen,

 Lapolis pe kontinny son lanket dan sa ka.

Lapolis in raporte ki en zofisye sekirite 41 an ki reste La Gogue ek en stevedore 33 an sorti North East Point, sispe  pour lofans vol kont touris in formelman ganny sarze ozordi bomaten devan lakour Mazistra e zot in ganny rimann ziska le 25 Avril zour ki zot pou repas ankour.

Larestasyon sa 2 akize ti fer pandan lazournen yer Merkredi swivan rapor kot 2 iphone pou en viziter etranze ti ganny vole lo lans North East Point Mardi le 12.

Lapolis pe raporte ki en lanket I an progre swivan demonstrasyon avek plakar dan zanmerant Lorloz yer apremidi par en pti group Sri Lanken.

Plakar ki ti pe ganny ekspoze I annan pou fer avek sitiasyon politik ki pe arive dan zot pei natal, Sri Lanka.

Lapolis I dir ki sa protestasyon ti ilegal e napa okenn permisyon oubyen lotorizasyon donnen par ni lapolis oubyen Komisyonner lasante e in osi napa okenn notifikasyon adrese kot lotorite konsernen lo lentensyon pou sa group dimoun fer protestasyon oubyen demonstrasyon dan landrwa piblik.

Lakour Siprenm in le 1 Avril kondann Steve Esparon, en zonm dan son 30 tenn lannen ki reste Anse Aux Pins 15 an prizon pou lofans labi seksyel lo en fiy anba laz. Letan Esparon ti komet sa lofans an 2019, sa fiy ti napa 15 an.

Rapor sa lensidan sa letan ti ganny fer avek lotorite Servis Sosyal e ka in ankete par lapolis.

En “sky diver” madanm etranze i ganny dimal serye dan ros lo La Digue.

En viziter madanm Ameriken aze 33 an i admit lo ward lopital Sesel swivan en lensidan enfortinen lo La Digue yer apremidi.

Ti ver 2:48 apremidi ki lapolis ti ganny enformen ki en “sky diver” tin rann lapel dan roz dan zanmerant Grand Anse La Digue e i tin resevwar dimal serye dan son lipye kote gos. Sa madanm ti inisyalman ganny premye swen kot sant medikal Logan lo La Digue apre ganny transporte Mahe par ‘helicopter’pou swen pli spesyalize.

Son kondisyon in aprezan ganny dekri koman stab e lanket I an progre pou etablir sirkonstans otour tel lensidan ki tin kapab trazik.

En zonm aze I ganny dekouver mor dan lakaz  seli Anse Aux Pins.

Lapolis pe egalman raporte ki en zonm 70 an ki normalman reste litousel Chetty Flat Anse Aux Pin in ozordi bomaten ganny dekouver mor dan lakaz.

Lapolis ti ganny enformen lo sa lensidan ver 8:03 bomaten. Sa dekouvert ti ariv apre ki en vwazen ki abitye organiz zarden sa msye  tin trouv son  bil PUC deor e tin ranmase pou donn li e sete swivan sa ki I ti vwar li asize pa pe ‘respond’ dan fotey dan salon.

En lanket in komanse annatandan rezilta letopsi pou etabli lakoz e posibleman sirkonstans otour lanmor sa msye 70 an.

Sa manager laboutik lo Praslin ki ti ganny arete  le 18 Mars pou lofans vol I ganny sarze.

Lakour Mazistra in yer Lendi le 4 Avril sarz sa “Manager” laboutik ki ti ganny arete le 18 Mars pou lofans ‘‘stealing by Servant” e apre larg li lo serten kondisyon.

Parmi bann kondisyon ki sa akize in ganny large lo la i sinny en kosyon 100,000 roupi, remet son paspor avek lakour, I pa ganny drwa kit pei san lotorizasyon lakour e osi sinny liv lakour kot lapolis en fwa  par semenn. Mansyon sa ka pou fer isi Mahe le 21 Avril e plitar ganny transfer Praslin pou ekoute e zizman.

Michel Estrale I ankor manke.

Resers e lanket anmennen par lapolis pou retrouv Michel Estrale, sa zonm Le Niole raporte manke par son fanmiy depi Merkredi le 23 Mars I ankor anven.

Ankor enn fwa lapolis pe lans lapel avek nenport endividi kin dernyen fwa trouv li oubyen ki annan lenformasyon kredib lo son disparisyon pou kontakte son sant komann oubyen CID.