Lakour Siprenm in le 1 Avril kondann Steve Esparon, en zonm dan son 30 tenn lannen ki reste Anse Aux Pins 15 an prizon pou lofans labi seksyel lo en fiy anba laz. Letan Esparon ti komet sa lofans an 2019, sa fiy ti napa 15 an.

Rapor sa lensidan sa letan ti ganny fer avek lotorite Servis Sosyal e ka in ankete par lapolis.

En “sky diver” madanm etranze i ganny dimal serye dan ros lo La Digue.

En viziter madanm Ameriken aze 33 an i admit lo ward lopital Sesel swivan en lensidan enfortinen lo La Digue yer apremidi.

Ti ver 2:48 apremidi ki lapolis ti ganny enformen ki en “sky diver” tin rann lapel dan roz dan zanmerant Grand Anse La Digue e i tin resevwar dimal serye dan son lipye kote gos. Sa madanm ti inisyalman ganny premye swen kot sant medikal Logan lo La Digue apre ganny transporte Mahe par ‘helicopter’pou swen pli spesyalize.

Son kondisyon in aprezan ganny dekri koman stab e lanket I an progre pou etablir sirkonstans otour tel lensidan ki tin kapab trazik.

En zonm aze I ganny dekouver mor dan lakaz  seli Anse Aux Pins.

Lapolis pe egalman raporte ki en zonm 70 an ki normalman reste litousel Chetty Flat Anse Aux Pin in ozordi bomaten ganny dekouver mor dan lakaz.

Lapolis ti ganny enformen lo sa lensidan ver 8:03 bomaten. Sa dekouvert ti ariv apre ki en vwazen ki abitye organiz zarden sa msye  tin trouv son  bil PUC deor e tin ranmase pou donn li e sete swivan sa ki I ti vwar li asize pa pe ‘respond’ dan fotey dan salon.

En lanket in komanse annatandan rezilta letopsi pou etabli lakoz e posibleman sirkonstans otour lanmor sa msye 70 an.

Sa manager laboutik lo Praslin ki ti ganny arete  le 18 Mars pou lofans vol I ganny sarze.

Lakour Mazistra in yer Lendi le 4 Avril sarz sa “Manager” laboutik ki ti ganny arete le 18 Mars pou lofans ‘‘stealing by Servant” e apre larg li lo serten kondisyon.

Parmi bann kondisyon ki sa akize in ganny large lo la i sinny en kosyon 100,000 roupi, remet son paspor avek lakour, I pa ganny drwa kit pei san lotorizasyon lakour e osi sinny liv lakour kot lapolis en fwa  par semenn. Mansyon sa ka pou fer isi Mahe le 21 Avril e plitar ganny transfer Praslin pou ekoute e zizman.

Michel Estrale I ankor manke.

Resers e lanket anmennen par lapolis pou retrouv Michel Estrale, sa zonm Le Niole raporte manke par son fanmiy depi Merkredi le 23 Mars I ankor anven.

Ankor enn fwa lapolis pe lans lapel avek nenport endividi kin dernyen fwa trouv li oubyen ki annan lenformasyon kredib lo son disparisyon pou kontakte son sant komann oubyen CID.

En garson 19 an in ozordi apremidi ganny tape par en Picanto vye model  kouler nwanr Barbarons Estate dan zanmerant stasyon delo PUC an desandan avan ariv kot depo bis SPTC.

Sa aksidan kot sa Picanto pann arete pou get son viktim ti ariv ver 1:20 apremidi.

Sa garson ki ti pe konplent douler dan likou, lebra, ledo ek lazanm in resevwar tretman lopital Sesel apre ganny large e lapolis pe demann nenport dimoun ki annan lenformasyon lo sa Picanto pou kontakte son sant komann oubyen stasyon lapolis Anse Boileau.

En zonm 50 an parkont li in admit lo ward lopital Sesel avek felir dan latet swivan en bagar kin arive obor kot en landwra divertisman dan Victoria yer swar. Sispe dan sa lensidan pakor ganny arete e lanket I an progre dan sa ka.

En viziter alman aze 61 an ti ganny retrouve par 2 sivilyen apre ki I tin raporte perdi semen lo “trail Cherimon”  sorti Anse Lazio pou al Anse Georgette Praslin yer Merkredi apremidi, tandis ki resers pou retrouv son koleg , en lot alman aze 68 an I kontinnyen.

Sa 2 viziter ki pe reste Lotel  Berjaya Cote Dor ti ariv dan pei le 27 Mars e zot sipoze kite le 14 Avril. Zot tin kit lotel ver 9:40 yer bomaten pou al Anse Georgette e lapel pou laistans ti fer atraver lalinny dirzans sant komann lapolis par sa enn kin ganny retrouve  ver 3:00er apremidi.

Dapre sa enn kin ganny retrouve, I tin kit son dalon lo kwaze cherimon ek Chenai e ler I pann trouv son dalon rezwenn li pli devan I ti kriye e averti li pou retroun lotel. Plitar ler li a so tour I tin perdi semen I kriye pou lasistans e sete la ki sa 2 sivilyen in tande e sov li kot apre lapolis ki tin ganny deplwaye ti etablir kontak ek zot lokasyon, zwenn zot e retourn avek sa alman kot lotel.

Rapor ki sa lot alman pa ti ankor retourn kot lotel ti fer avek lapolis ver 7:15 par manager lotel e la ankor ennfwa, lapolis asiste par 3 sivilyen ti retourn lo “trail” Cherimon ek Chenai pou loperasyon resers ziska 2er bomaten, pran e poz e repran ankor 5:30 bomaten.

 Angaze dan sa loperasyon resers ki ankor an progre I osi annan lisyen ek pilot ‘drone’ kin egalman angaze dan resers pou retrouv Michel Estrale sorti Le Niole e ki ankor manke ziska prezan.

En zonm 49 an sorti La Digue in ganny anmenn devan lakour Mazistra yer kot in formelman ganny sarze pou 2 ka “Idle and disorderly person” e 1 ka akt endesan dan stasyon lapolis.  Sa akize in konmet sa bann lofans tou resaman lo La Digue.

Lapolis ti fer en demann avek lakour pou ki sa aprezan akize I ganny rimann pou 14 zour swivan son bann lofans ki I tin komet.

Mazistra in akord demann lapolis e sa akize in ganny rimann prizon Montagne Posse pou 14 zour .

Lapolis in raporte ki kondisyon sa pti garson ki ti preziman ganny tape avek transpor kot li lo La Digue zedi bomaten I ankor kritik. Osi ankor dan kondisyon kritik I sa zonm 25 an enkplike dan aksidan Talbot Cascade yer dimans granmaten.

Parkont in annan en pti ameliorasyon dan kondisyon sa zonm 33 an sorti Anse Louis enplike dan aksidan Highway sorti kritik pou vin stab me I ankor admit dan younit swen entansif parey sa pti garson e sa zonm dan aksidan Talbot.

An relasyon avek lensidan kot en zonm 32 an ki reste Les Cannelles ki ti ganny bate lo lans swivan en piknik sanmdi Anse Royale, li I admit lo ward e son kondisyon I stab.

Apre I annan en viziter madanm sorti La Risi ki admit lopital sesel swivan dimal ki in resevwar lo plizyer parti son lekor apre ki I ti ganny tape avek laroul Anse Koko lo La Digue ver milye lazournen sanmdi. En lensidan ki ti nesesit entervansyon zofisye lazans tenny dife ek sovtaz pou transport sa viktim sorti Anse Koko par bato ziska La Passe pou ganny anmennen lopital Logan kot I ti ganny lasistans medikal e plitar ganny transporte Mahe. Kondisyon sa madanm I stab.

Letospi in fer lo lekor Jean Michel Dufrenes 20 an sorti St Louis ki ti mor dan en lensidan trazik Vandredi le 24 Mars 2022, kot en waterfall Grand Anse Mahe e lakoz son lanmor in noye.