Lapolis pe raporte ki in reisi etablir idantite sa zonm, prezimen pann ki son lekor ti ganny dekouver yer Les Cannelles.

Kontakt in ganny fer avek serten manm pli pros son fanmiy pou bann formalite neseser e son idantite ava ganny devwale plitar. Lanket pe sepandan kontinnyen anatandan rapor rezilta letopsi pou etablir ekzakt lakoz osibyen ki posibilite sirkonstans otour lanmor sa msye.

Lapolis I oule profite pou remersi manm piblik kin kontakte e ofer zot lasistans an relasyon avek sa ka ziska prezan.

Lapolis pe ankor ennfwa lans lapel pou led avek idantifikasyon lekor sa msye, dekouver prezimen pann Les Cannelles dan zanmerant Wellness Centre yer ver milye lazournen.

Apard lenformasyon fer sorti par lapolis yer dan son kominike, osi dekouver lo sa “scene” Les Cannelles yer ti  en pti sak ver 3 roupi dan ki ti annan en triko ble pal, en kannson kaki demi bwa avek pos dan de kote osibyen ki en pti meter rouz ki servi pou teste voltaz kouran dan bann aytenm elektronik.

Lapolis pe demann nenport dimoun ki kwar I kapab asiste pou idantifye sa zonm e dimoun ki annan lenformasyon kredib ki kapab ed li dan son lanket pou sil vouple telefonn son Sant Komann baze Victoria, kordgard Anse Royale oubyen CID.

 Lapolis pe egalman kondann sirkilasyon portre  sa zonm lo rezo sosyal  sirtou dan leta ki son lekor I ete. I pe ankor ennfwa demann manm piblik pou evit sa bann sirkilasyon e pou demontre enpe plis resposabilite moral osibyen ki respe pou lekor mor fanmiy zot kanmarad.

Lapolis in komans lanket antretan ki I essey etablir idantite en zonm kin ganny dekouver prezimen pann dan en lakaz an tol abandonnen zis avan “Wellness Centre” Le Cannelles dan distrik Anse Royale ver milye lazournen ozordi.

Patolozis kin ekzamin sa zonm I prezimen ki in kapab mor ant 4 a 6 zour.

Sa zonm i en dimoun lapo nwanr, i mezir anviron 1.6 m, I dan en kannson Jeans ble pal ek en triko sann tire lo nwanr ki devan lo la I annan portre figir en zonm dan linet.

Lapolis pe demann nenport endividi ki kapab ede pou idantifye sa lekor pou kontakte son Sant komann, kordgard Anse Royale oubyen CID irzan.

3 peser, 2 aze 35 an sorti La Misere ek Au Cap e lot 27 an Perseverance  in ganny arete, ganny anmenn ankour e rimann pou 14 zour swivan lanket ki lapolis pe fer apre ki zot in retourn ater san en 4yenm zonm ki zot tin al lapes ansanm.

Rapor tel lensidan ti fer Kordgard Santral ver 9er diswar Merkredi le 26 Zanvye par sa peser  35 an   sorti La Misere.  Manke e raporte disparet lo sa bato lapes apele “Torti”  i patron Paul Benoit aze 45 an ki reste La Louise.

Dapre sa peser ki ti raport Santral,  zot ti kit ater dimans le 23 Zanvye, mouy bato obor “Bird island” aswar le 25, dormi,  e son le 26 ver 7er bomaten letan zot ti leve zot pa ti war Paul abor, sa I menm apre ki zot tin esey fer resers dan zanmerant pou retrouv li.

Sa 3 peser ti retournen e ariv  Mahe ver 8 er diswar kot 1erdtan apre, sa lensidan ti ganny  raporte.  Larestasyon sa 3 sispe dan disparisyon Paul Benoit ti fer yer  Zedi bomaten e zot ti pas devan lakour Siprenm yer apremidi.

Swivan en loperasyon monte par lapolis avek lasistans zofisye militer, manm fanmiy e plitar zofisye lazans tenny dife ek sovtaz, lavi en msye 63 an in posibleman ganny sove yer swar dan distrik Anse Aux Pins.

Sa Msye, Martial Albest ki tin resevwar premye swen par zofisye lapolis ek zofisye militer ti ganny transporte lopital par lanbilans e plitar admit lo ward lopital sesel kot I pe rekipere swivan serten dimal ki I tin resevwar apre ganny dekouver dan en ranpar parmi kap ros ek lalyann lwen avek kot I reste en landrwa apele dan Gravye. Sete manm sa fanmiy dan loperasyon resers ki tin tann kriye dan direksyon kot I tin tombe e pri. 

Loperasyon pou retrouv Msye Albest ki annan serten kondisyon lasante ti vin swivan en rapor fer par manm son fanmiy Kordgard Anse Aux Pins yer tar apremidi apre ki I tin kit son lakour depi avantyer bomaten e I pa tin retrounen. Loperasyon pou retir Msye Albest  kot I tin tombe e pri  ti komans ver 6:40 e ale ziska ver 8:05 diswar, anviron 1 erdtan 30 minit.

Lapolis pe raporte ki swivan lanket ki an progre dan ka posesyon zarm ek aminisyon pandan lazournen ozordi i annan ankor zarm, aminisyon osibyen ki serten kantite larzan an deviz etranzer kin ganny dekouver e sezi kot lakour premye avek dezyenm sispe.

En zonm 26 an ki reste Perseverance in formelman ganny sarze ozordi pou lofans kas lakaz osibyen ki pou lofans vole dan lakaz.

Sa akize ki Mazistra in ordonnen pou pey en kosyon 5000 roupi koman enn bann kondisyon pou son liberte provizwar pou ganny rimann Bois De Rose  ziska le 1 Fevriye si I pa arive onor sa kondisyon. Le 1 Fevriye I pou reganny anmenn ankour kot I ekspekte ganny sarze pou ankor 2 lezot lofans asosye avek vol.

 Lapolis in osi raporte ki en lot zonm 36 an ki reste Perseverance in formelman ganny sarze yer devan lakour Mazistra pou lofans kas lakaz e vole osibyen ki pou andomaz propriyete.

Sa akize ki ti komet sa 2 lofans le 7 Zanvye Gaza dan distrik Au Cap in ozordi reganny anmenn ankour dan konpani en lot zonm sispe 41 an ki dir I reste Roche Caiman e toule 2 in formelman ganny sarze pou 4 diferan ka kas batiman e vole kin arive dan rezyon lavil tar lannen pase e osi komansman sa lannen.

Sa 2 akize kin aprezan ganny rimann prizon Montagne Posee i ekspekte egalman ganny sarze okour sa bann zour ki pe vini pou lezot lofans vol anrezistre kordgard Mont Fleuri tou resaman.

Lapolis in raporte ki en zonm 21 an kin donn son ladres koman  Bevedere avek en lot 26 an ki reste Anse Norde in ozordi ganny rimann prizon Montagne Posee an koneksyon avek plizyer lofans tel ki kas lakaz, kas batiman e vole osibyen ki pou vole lo lans e vol transpor. I egalman annan lofans sove an detansyon legal kin ganny anrezistre kont sa 2 zonm.

Mazorite lofans kont sa 2 dimoun in raporte arive dan rezyon Mont Fleuri ek Sid Mahe tou dernyenman.

Lapolis pe antretan kontinnyen avek son lanket dan sa bann ka kot zot ekspekte ganny sarze byento.

Lapolis in raporte ki apre 14 zour rimann, en zonm 31 an ki reste Belvedere in formelman ganny sarze devan lakour Mazistra yer Mardi le 18 Zanvye pou lofans vol. Premye ka ti ariv dan en laboutik Rochon le 26 Novanm lannen pase tandis ki lot ti dan en laboutik Hermitage le 3 Zanvye sa lannen kot sa akize ti vole e tay avek pers larzan son 2 viktim.

Sa akize ki pann kapab zwenn serten kondisyon ki Mazistra tin enpoz lo li pou son liberte provizwar pe kontinnyelman reste lo rimann pou li aprezan repas ankour le 1 Fevriye.

Lapolis pe ansemoman kontinnyen avek lanket kont sa menm akize ki osi sispe dan 3 diferan ka kas lakaz e vole Belvedere ek Copolia raporte Kordgard Mont Fleuri le 29 Desanm lannen pase e 1 Zanvye sa lannen.