Lapolis pe raporte sa 5yenm zonm ki ti ganny arete boner mwan pase an relasyon avek lanket dan ka lanmor Berney Appasamy lannen pase i en zonm lib. Sa biznesmenn ti ganny large apre ki i tin ganny anmenn ankour apre son larestasyon e lakour ti ordonnen ki napa lenvidans e rezon pou li kontinnyen ganny deternir alor larg li san kondisyon. Ou ava rapel ki i annan 4 sispe kin fini ganny sarze dan sa ka ki zizman pe byento al komans ganny ekoute par lakour siprenm.

Lapolis pe raporte ki ankor 3 zonm, sispe dan lensidan kas batiman e vole ki ti arive pandan wikenn kot stasyon petrol Ile Du Port in ganny anmenn ankour ozordi kot zot in ganny rimann pou repas ankour le 3 May ansanm avek sa premye sispe  ki ti ganny rimann yer.

 Sa 3 sispe ki sorti Mont Buxton, La Gogue e vilaz Quincy ti ganny arête yer pandan lazournen,

 Lapolis pe kontinny son lanket dan sa ka.

Lapolis in raporte ki en zofisye sekirite 41 an ki reste La Gogue ek en stevedore 33 an sorti North East Point, sispe  pour lofans vol kont touris in formelman ganny sarze ozordi bomaten devan lakour Mazistra e zot in ganny rimann ziska le 25 Avril zour ki zot pou repas ankour.

Larestasyon sa 2 akize ti fer pandan lazournen yer Merkredi swivan rapor kot 2 iphone pou en viziter etranze ti ganny vole lo lans North East Point Mardi le 12.

Lapolis pe raporte ki en lanket I an progre swivan demonstrasyon avek plakar dan zanmerant Lorloz yer apremidi par en pti group Sri Lanken.

Plakar ki ti pe ganny ekspoze I annan pou fer avek sitiasyon politik ki pe arive dan zot pei natal, Sri Lanka.

Lapolis I dir ki sa protestasyon ti ilegal e napa okenn permisyon oubyen lotorizasyon donnen par ni lapolis oubyen Komisyonner lasante e in osi napa okenn notifikasyon adrese kot lotorite konsernen lo lentensyon pou sa group dimoun fer protestasyon oubyen demonstrasyon dan landrwa piblik.