Loperasyon resers par zofisye Gard lakot Sesel, Marine Police ek CID deklanse yer apremidi e kontinnyen ozordi bomaten pou rod en zonm Swiss ki tin anvoy en mesaz detres an mer dan zanmerant zil Manmel in treminen apre ki sa zonm ki ti lo en bato ti sen e sof kot en letablisman touristik dan distrik Anse Etoile.

Sa bato ki sa zonm ti lo la ti ganny idantifye par zofisye angaze dan loperasyon zisteman dan rezyon zil Manmel apre ki sa lensidan tin ganny raporte. Dapre rapor sa bato ki tin  pran delo ti apre savire anba lao e ti napa person retrouve abor.

Akoz move kondisyon lanmer dan sa landrwa, loperasyon ki ti bezwen abandonnen yer swar ti repran bomaten kot sa bato I ganny trouve ater par deryer zil Manmel.

Ti selman zis apre 10 bomaten ki lapolis ti aprann atraver son met bato ki sa zonm tin ganny sove par en lot bato ki tin pas dan sa zanmerant e I tin ganny anmennen ater sen e sof.

Rapor sa lensidan ti fer avek lapolis ver 4:27 yer apremidi.

Dan en lot lensidan parkont, loperasyon resers pe kontinnyen dan rezyon Nor Mahe swivan rapor disparisyon Msye Michel Estrale aze 50 an ki reste Le Niole.

Rapor Msye Estrale manke ti fer avek lapolis tar dan lannwit Merkredi par en manm  son fanmiy apre ki I pa tin rantre kot lakour sa swar parey son labitid.

Lapel atraver diferan form media fer depi yer pandan lazournen pou li kontakte son fanmiy oubyen kordgard pli pre ziska prezan in ankor an ven.

Apard lapolis, osi angaze dan sa loperasyon resers pou essey retrouv msye Estrale I serten manm son fanmiy.

Michel Estrale aze 50 an sorti Le Niole pran kontak avek ou fanmiy irzan oubyen raport kot okenn stasyon lapolis. Michel Estrale in kit lakour son fanmiy depi yerswar Merkredi le 23 Mars 2022 ziska prezan son fanmiy pa konnen kot i ete.

Lapolis pe demann nenport endividi kin vwar oubyen annan lenformasyon kote Michel Estrale i kapab ete pou kontakte son sant komann lo 4288000 ou kordgard Beau Vallon lo 4288096 irzan.

Lapolis pe raporte ki in komans lanket swivan lensidan kot en garson 20 an ki reste St Louis in prezimen noye Kot en “waterfall’’ Grand Anse ki PUC I ranmas delo, trete e apre redistribye.

Dapre rapor sa garson, Jean Michel Dufresne ki pa konn naze e ki ti anploye avek divizyon lafore tin al rod delo pou bwar letan I ti glise e tonm dan delo.

O moman sa lensidan Jean Michel ti akonpannyen par enn son koleg travay ki dir I ti esseye pou sov li me I pann reisi.

Sa lensidan ti ganny raporte avek lapolis ver 12:30 ozordi.

Lanket pe kontinnyen dan sa ka pou etablir sirkonstans otour sa lensidan trazik annatandan rezilta letopsi pou determin ekzakt lakoz lanmor Jean Michel.

Lapolis pe raporte ki sa zonm 25 an dan lensidan le 9 Mars Port Glaud in formelman ganny sarze pou lofans andomaz propriyete e konportman dezordonnen dan kordgard.

Sa zonm kin fer 14 zour lo rimann e ki ti repas ankour yer Mardi in ganny large lo serten kondisyon apre ganny sarze devan lakour mazistra.

Si zanmen sa akize I kas serten sa bann kondisyon kin ganny enpoze lo li pou son liberte provizwar I pou reganny arete, ganny anmenn ankour e ganny rimann ziska son zafer I ganny ekoute.

Ou ava rapel ki i annan ankor 2 sispe ki pe ganny porsekite dan sa ka, sa I en madanm 33 an ek son konpanny aze 32 an ki egalman reste Port Glaud.

En ‘manager’ laboutik lo Praslin in ganny anmenn ankour ozordi bomaten kot in formelman ganny sarze pou lofans vol (stealing by servant).

Rapor sa lensidan e larestasyon sa manager endyen aze 30 an Vandredi le 18 Mars ti vin apre ki propriyeter sa laboutik tin fer en odit lo bann tranzaksyon son laboutik swivan labsans sa ‘Manager’ dan pei e dekouver ki en gro sonm larzan ti manke.

Sa aprezan akize ki tin al vakans dan Lenn depi lafen Zanvye sa lannen ti retourn Sesel le 13 Mars in anploye koman responsab sa laboutik depi 2014.

Mizistra in ordonnen ki sa akize I ganny rimann pou retourn ankour le 4 Avril.

Antretan lapolis I kontinnyen avek son lanket dan sa ka.