Central Police Headquarters, Victoria
Mon - Fri: 8.00 am to 4.00 pm.
Emergencies
999.
Crime Sropper
133

Communique

Vizit

Komisyoner Lapolis, Msye Ted Barbe, ti ansanm avek Sou-Lenspekter Julinio Nourrice, zofisye an sarz Younit Relasyon Piblik dan Lapolis, Kaporal Alissa Perine, zofisye lyezon pour Tourizm dan Lapolis ek Msye Dereck Samson, konseye teknik dan lofis Komisyoner Lapolis, ti fer en vizit ozordi apremidi kot Msye Haryl Andre, aze 21 an, kot son rezidans Larivyer Anglez.
 
Sa vizit ti ganny fer apre ki Msye Andre ti fek ganny desarze Lopital Sesel ozordi apremidi. Komisyoner Lapolis ti eksprim son lapresiyasyon e felisitasyon personnelman avek Msye Andre pour son zes brav, remarkab e ranpli avek kouraz pandan de lensidan separe ki ti arive dan lanmer Grand Anse Mahe, yer apremidi.
Additional Images:
1002240535
1002240537

Kominike (Swivi)

En zonm 47an avek Nasyonalite Alman, in prezimen noye ozordi apremidi dan lanmer Grand Anse Mahe. 
 
Tandis ki son konpany en madanm Alman li osi, in resisi ganny sove. Sa ti par de sivilyen Msye Neddy Julie ki en ansyen "Life Guard", ek Msye Harly Andre ki li in ganny transporte lopital Sesel pour swen medikal pli spesyalize. 
 
Dapre rapor inisyal ki lapolis in ranmase, sa de endividi tin al an benn mer, o moman kot zot ti rankontre difikilte dan lanmer
 
Lapolis ti ganny alerte lo sa lensidan ver 3er 10 apremidi pour lasistans, antretan en lanket in komanse dan sa enn ka. 

Kominike

De sivilyen Msye Neddy Julie, en ansyen Lifeguard, ek Harly Andre  in demontre kouraz ek devosyon an esey sov lavi de viziter ki ti an detres dan lanmer Grand Anse Mahe ozordi apremidi.
 
Malerezman, enn parmi sa viziter, ki en msye 47 an, in perdi son lavi malgre zefor sovtaz ki ti ganny fer.
 
Harly Andre li menm in ganny transporte lopital Sesel pour resevwar swen medikal pli spesyalize. Lapolis i ekspekte anmenn en ekstre avek sa de endividi tre byento. 
 
Departman Lapolis i salye kouraz ek aksyon brav sa de sivilyen pour zot aksyon remarkab ozordi apremidi.
 

Kominike

Lapolis in konfirmen ki en viziter Msye in prezimen noye dan lanmer, Grand Anse Mahe, ozordi apremidi. 
 
Plis detay dan en prosen kominike. 

Kominike

Lapolis pe demann okenn endividi ki konnen oubyen annan lenformasyon kredib lo kote sa transpor S28213, en Kia Picanto kouler ble, parey trouve dan sa portre I kapab ete pou kontakte kordgard Anse Aux Pins lo 4303737 ou sant komann lapolis lo 4288000, 4288042, lanir anonim 133 ou atraver bann platform lapolis lo rezyo sosyal.
 
Sa loto in ganny raporte vole ant Zedi tar aswar pour al lo Vandredi granmaten, Anse Aux Pins dan zanmerant vye zarden zanfan.
Additional Images:
1002229730

Kominike (Swivi)

Sa Kia Picanto S28213, kouler Ble, ki tin ganny raporte vole tar Zedi swar pour al lo Vandredi granmaten, Anse Aux Pins dan zanmerant vye zarden zanfan. In ansemoman ganny retrouve anbadonnen dan rezyon Perseverance. 
 
Lapolis i oule remersye tou endividi, kin ede dan en fason ou en lot avek lenformasyon kredib pour kapab revwar sa transpor, e lapolis pe demann okenn endividi ki konnen oubyen annan lenformasyon lo kek endividi, ki responsab pour vol sa transpor pour antre an kontak avek seksyon CID Anse Aux Pins psr 4303737.

Kominike

Ramick Mussard  aze 29an sorti Roche Bois, La Digue in formelman ganny sarze devan Lakour Mazistra Mahe, dan 1 ka vol, kont etranze, kin arive le 22 Oktob 2025, lo La Digue.

Mazistra in larg Mussard lo sa bann kondisyon swivan; en kosyon 8 mil roupi ki i pour bezwen peye pour son laliberte provizwar, pour pa enterfer avek temwen dan sa ka, pour pa komet okenn lofans similer, pandan letan ki I pour deor lo laliberte provizwar, pour sinny liv Lakour dan kordgard La Digue, 1 fwa par semenn, avan 6er diswar.

Viki Mussard pann reisi akord demann Lakour, pour pey sa kosyon 8mil roupi, in ganny rimann Prizon Montagne Posse, kot si I arive peye, I pour ganny large, e I pour bezwen sivre sa bann kondisyon. Dan sa enn ka lapolis tin reisi rekiper mazorite propriyete ki tin ganny raporte vole.

Kominike

Eddy Bomboche aze 37an sorti La Passe, La Digue in formelman ganny sarze devan Lakour Mazistra Mahe, dan 2 ka vol, kont etranze, kin arive le 22 Oktob 2025, lo La Digue.

Mazistra in larg Bomboche lo sa bann kondisyon swivan; an total pour tou le 2 ka, en kosyon 20 mil roupi ki i pour bezwen peye pour son laliberte provizwar, pour pa enterfer avek temwen dan sa ka, pour pa komet okenn lofans similer, pandan letan ki I pour deor lo laliberte provizwar, pour sinny en “Bail Bond” 20mil roupi, an total e pou sinny liv Lakour dan kordgard La Digue, 3 fwa par semenn. Mazistra in enpoz menm kondisyon lo sa akize dan dezyenm ka osi.

Viki Bomboche pann reisi akord demann Lakour, pour pey sa kosyon 20mil roupi, in ganny rimann Prizon Montagne Posse, kot si I arive peye, I pour ganny large, e I pour bezwen sivre sa bann kondisyon. Dan sa enn ka lapolis tin reisi rekiper mazorite propriyete ki tin ganny raporte vole.

Lanons Semen Frenmen

Motoris pe ganny enformen ki semen depi Ron Pwen Roche Caiman vizavi stasyon petrol ziska Ron Pwen kot Eden Island pou al ver Sid e Ron Pwen Eden Island ziska Ron Pwen Roche Caiman vizavi stasyon petrol pou konpletman frenmen aparti 10er bomaten ziska 11er 50 Zedi le 23 Oktob 2025.
 
Sa pou permet lapolis e lezot lazans konsernen fer serten travay an relasyon avek sa ka aksidan fatal kin arive le 20 Septanm 2025..
 
Lapolis pe demann motoris pou servi lezot semen alternativ.

Kominike

Departman Lapolis i oule enform manm piblik ki depi bomaten, lapolis in resevwar de (2) fo rapor dife, dan lakaz. Me apre verifikasyon par bann zofisye Lapolis e Lazans Servis Tenny Dife Ek Sovtaz (SFRSA), in konfirmen ki pa ti annan okenn dife.
 
Manm piblik i ganny rapele ki fer fo rapor oubyen donn fo lenformasyon avek en zofisye lapolis i en lofans grav anba lalwa, ki kapab anmenn en prosekisyon, devan Lakour.
 
Sa kalite konportman i gaspiy resours leta, enkli bann personnel, transpor, ek materyo sekour, e i kapab osi retard bann lazans sekour pour ariv lo bann vre lensidan kot lavi ek propriyete en endividi i vreman an danze.
 
Departman Lapolis i lans en lapel avek tou sitwayen pour akt avek responsabilite e servi bann nimero dirzans zis dan vre ka neseser.
 
Ansanm, annou protez resours leta e gard nou kominote an sekirite.

More Articles ...

About

The police force in the Seychelles is a national body which falls under the control of the National Commissioner of Police, who is appointed by the President subject to the approval of the National Assembly....
More

Quick Links

Resources

Contacts

Police Headquarters, P.O Box 46, Victoria, Mahe, Seychelles

Email us on:
info@police.gov.sc

Contact
Phone: 4288000

Privacy Policy

All press release and communique on this website is copyrighted content from the Seychelles Nation, Today newspaper and The Seychelles Police force.

Cookie Policy →

999133