Jean-Paul Banane aze 34an sorti Anse Boileau ek Vanessa Payet aze 32an sorti Baie Lazare. In kondannen devan Lakour Siprenm, dan 3 ka. Sa I pour lofans Trafik en drog kontrole, An posesyon en drog kontrole e An posesyon zartifs pou fasilit servi ou trafik en drog kontrole.

Ziz in kondann Banane ek Payet, dan premye ka, 2 an prizon sakenn, avek en lanmann 40mil roupi sakenn, ki zot pour bezwen peye avan 1an. Ziz in ordonnen ki zot santans prizon I ganny sispann, pour 3an.

Dan dezyenm ek twazyenm ka, Ziz in kondann saken, en lanmann 5mil roupi an total, kot zot pour bezwen pey li avan 5mwan.

Banane ek Payet, ti komet sa lofans le 26 Zen 2024, Anse La mouche, landwa kot zot ti pe reste, kot lapolis ti aret zot an posesyon 46.40granm Heroin, 7.8 granm Canabis e an posesyon en balans nimerik ki lo la, ti kontenir latras en drog kontrole apele Harsish. 

Sa zonm 28an sorti Beau Vallon, ki ti lo rimann andetansyon lapolis, an koneksyon avek en ka Labi seksyel ki younit Child Proection, dan lafors lapolis ti pe fer lanket ladan.

In ozordi bomaten repas devan Lakour Siprenm, kot in formelman ganny sarze pour lofans Labi seksyel lo en miner, e pour donn en miner en drog kontrole. Sa akize ti komet sa lofans le 29 Zen 2025, dan rezyon Beau Vallon, e sa lensidan ti ganny raporte avek lapolis le 3 Zilyet 2025.

Ziz in rimann sa akize, prizon Montagne Posse, e I ekspekte repas devan Lakour le 31 Zilyet 2025.

Ivan, Christian Sinon aze 34an ki en patron sorti Anse La Mouche. In formelman ganny sarze devan Lakour Siprenm ozordi bomaten pour lofans lenportasyon en drog kontrole. E sa lot zonm ki ti osi sispe dan sa ka, ki ti lo rimann, li in aprezan ganny desarze dan sa ka, ki fer I en zonm lib.

Sinon ti ganny arete, apre ki en parcel tin antre dan pei, le 1 Zilyet 2025, ki ti kontenir bann pyes transpor ladan, ki zofisye customs e lapolis ti annnan soupsyon ki sa parcel ti kontenir serten ketsoz ilegal ladan, kot lapolis ti sezi 1993 granm Cocain dan sa parcel. 

Ziz in ordonnen ki Sinon, I ganny garde lo rimann Prizon Montagne Posse ziska le 24 Zilyet 2025, zour ki I ekspekte repas devan Lakour.

Lavi, e propriyete en msye aze 77an sorti Mont Buxton in ganny sove, ozordi granmaten. Sa I par en group zofisye lapolis, sorti Santral, ki ti lo en patrol routinn ver 2er 39 bomaten dan sa distrik.

Letan ki sa group zofisye ti pe fer patrol dan transpor dan rezyon Mont Buxton, zot ti santi en loder abnormal, kot paret ti annan kek ketsoz pe brile. Sa ti atir latansyon sa bann zofisye, pour rode kwa sa vreman, kot zot ti diriz lo patrol apye pour esey rode, kot zot ti apersevwar gro lafimen pe sorti dan en lakaz. Deswit sa bann zofisye ti al ver sa lakaz e sey fer mannev pour verifye si ti annan dimoun dan sa lakaz, kot apre plizyer lesey zot ti apersevwar sa msye anndan dan lakaz pe dormi, kot zot ti alert li lo sa sitiasyon e retir li dan lakaz. Sa bann zofisye tin kapab etablir sirplas ki dife tin ganny kit alimen anba en kastrol, ki ti lo en cooker ki ti pe komans pran dife, kot zot ti reisi met sitiasyon anba kontrol.

Departman Lapolis I salye louvraz ki son bann zofisye in fer pour reaktre tre vit pour anpese ki sa sitiasyon tin kapab vin en fatalite, e osi detri lezot lakaz dan zalantour.