Lapolis in komans en lanket detaye pou etablir sirkonstans otour en lensidan dife dan Sant Rimann Bois De Rose, yerswar.

Lapolis ti ganny alerte pou lasistans anviron 7er 50 diswar. Dapre rapor inisyal ki lapolis in ranmase sa dife in komans dan en kaso, e ki napa okenn endividi kin ganny dimal anrezilta sa lensidan.

Departman Lapolis

Jean Louis Marie aze 21an sorti Port Glaud in formelman ganny sarze devan Lakour Mazistra Anse Royale ozordi bomaten pour lofans Menas an servan vyolans.

Marie ti komet sa lofans le 1 Oktob 2024, dan rezyon Port Glaud pou al ver kot "Waterfall" kot I ti menas en zonm avek en bikaw ki ti dan son posesyon. Lapolis atraver prosekisyon ti anmenn en mosyon pour enform Lakour ki Marie, tin kas lord e kondisyon ki sa menm Lakour tin enpoz lo li, dan ban ka oparavan.

Mazistra in ordonnen ki Marie I ganny rimann Prizon Montagne Posse ziska le 18 Oktob 2024.

Departman Lapolis

Said, Mohamed Rosline aze 28an sorti Belombre. In formelman ganny sarze devan Lakour Mazistra dan 5 ka relye, ek kas batiman e vole kin resaman arive dan rezyon Lavil. Roseline ti ganny arete le 21 Septanm 2024 granmaten dan rezyon Lavil, zis apre ki I tin fek kas en batiman e vole lo lari Rue Pierre de possession, kot lapolis ti sezi dan son posesyon serten propriyete ki tin ganny raporte vole. 

Dan 3 ka Mazistra in larg Said, Mohamed Rosline lo kosyon larzan, ki fer an total en sonm 28mil roupi, ki I pou bezwen peye pou son laliberte provizwar, e dan 2 ka Mazistra in larg Roseline lo en “ Bail Bond” 8mil roupi ki fer en total 16 mil roupi. Roseline pann reisi akord demann Lakour pou pey sa sonm 28mil roupi pour son laliberte provizwar, ki fer I ganny rimann Prizon Montagne Posse. Si I arive pey sa kosyon 28 mil roupi I pou ganny large e I pou bezwen sivre sa bann kondisyon swivan; pou raport dan kordgard Beau Vallon toule Vandredi ant 6er bomaten a 4er apremidi, pou pa angaze dan okenn aktivite kriminel, ou komet okenn lofans similer, e pou pa enterfer avek bann temwen potansyel dan sa bann ka. Sa ka pou repas devan Lakour le 17 Oktob 2024. 

Departman Lapolis

Shera Bouzin in kondann en lanmann devan Lakour Mazistra pour lofans an posesyon en drog kontrole. 

Mazistra in enpoz en lanmann 8mil roupi, ki Bouzin pou bezwen peye avan le 1 Zen 2025. Si Bouzin pa pey sa lanmann, I pou deservi en term 3mwan Prizon. 

Lapolis ti sezi dan son posesyon 2.01 granm Heroin (diamorphine).

Departman Lapolis

Clive Alissop aze 44an sorti Madarine Estate dan distrik Au Cap. In formelman ganny sarze devan Lakour Mazistra Ile du Port dan en ka koz dimal grav en endividi. Lapolis ti ganny alerte lo sa lensidan le 23 Septanm 2024 ver 9er 30 bomaten, sa I kot en zonm 41an sorti Montagne Posse ti gravman ganny blese dan son figir.  

Mazsitra ki ti pe ekout sa ka in larg Alissop lo sa bann kondisyon swivan; tel ki pou pey en kosyon 20mil roupi pou son laliberte provizwar, ki in fini peye. I pou bezwen aprezan sivre sa bann kondisyon swivan; pou pa komet okenn lofans similer pandan letan ki I deor lo laliberte provizwar, pou pa enterfer avek temwen dan sa ka, pou raport dan kordgard Anse Aux Pins 3 fwa par mwan dan Lendi. Sa ka pou repas devan Lakour Mazistra Anse Royale le 28 Oktob 2024. 

Departman Lapolis

2 zonm aze 28an sorti Perseverance in ganny arete e pe ganny deteni andetansyon Lapolis.

Sa i an koneksyon avek en ka, kot en kafeteria dan rezyon Lavil in ganny kase kot plizyer ketsoz tin ganny raporte vole. Lapolis ti ganny alerte lo sa lensidan ozordi ver 5er 5 bomaten.

Lapolis ti arete sa 2 sispe pa bokou letan apre sa rapor dan zanmerant semen Grandcourt, an posesyon plizyer propriyete ki tin prezimen ganny vole kot sa Kafeteria. Lapolis I oule felist son bann zofisye pou sa travay ki zot in fer. Antretan en lanket in komanse dan sa enn ka.

Departman Lapolis 

En garson 23an sorti Lari Angar in resevwar tretman Lopital Sesel apre plitar ganny large. Sa ti anrezilta en aksidan scooter ki ti arive yer apremidi Au Cap.

Dapre rapor inisyal ki lapolis in ranmase sa garson ki ti lo en scooter ti pe direksyon Lavil, o moman sa kolizyon ant en pickup ki ti pe fer direksyon Anse Royale. Lapolis ti ganny alerte lo sa aksidan ver 2er 45 apremidi, en lanket in komanse dan sa enn ka.

Departman Lapolis

En madanm 38an sorti La Louise, in admit lopital Sesel anrezilta en aksidan yer apremidi dan zanmerant Roche Caiman, e son kondisyon I stab. 

Dapre rapor inisyal ki lapolis in ranmase, sa madanm ki ti pe mont en scooter ti pe fer direksyon Roche Caiman o moman sa aksidan, kot en transpor ti tap avek son scooter e kontinyen ale. Anrezilta kot in sibir dimal ase serye lo plizyer parti son lekor. 

Lapolis ti ganny alerte lo sa aksidan ver 1er 15 apremidi en lanket in komanse dan sa enn ka, e lapolis pe demann okenn endividi ki annan lenformasyon kredib lo sa aksidan pou pran kontak avek seksyon Trafik kordgard Mont Fleuri lo 4288070.

Departman Lapolis

En Madanm in kondann 3 mwan Prizon devan Lakour Mazistra, pour lofans Negliz en zanfan. Mazistra ki ti pe ekout sa ka, in ordonnen ki son santans I ganny sispann pou en peryord 2an, e osi in enpoz en lanmann 5 mil roupi ki I pou bezwen peye avan le 1 Fevriye 2025. 

Sa lensidan ti ariv apre ki sa akize pa tin pran prekosyon pandan letan ki I ti pe fimen dan zalantour kot son zanfan ti ete, anrezilta kot sa zanfan ti ganny brile lo en parti son lekor avek sa tip sigaret. Sa zanfan ti aze 7mwan a sa letan. 

Departman Lapolis

En garson 22an sorti Anse Royale, ek en fiy 15an sorti Baie Lazare. In admit Lopital Sesel, e zot kondisyon I stab. Sa I anrezilta en aksidan kin arive yerswar dan zanmerant Grand Anse Mahe. 

Dapre rapor inisyal ki lapolis in ranmase, sa garson ki ti pe mont en moter ti pe fer direksyon Grand Anse o moman sa aksidan, kot I ti al rann lapel an deor semen dan lapay. Anrezilta sa aksidan sa garson in sibir plizyer dimal lo son lekor, e sa fiy 15 an ki li ti pasaze lo sa moter in osi sibir serten dimal lo en parti son lekor. En lanket In komanse dan sa enn ka. 

Departman Lapolis