Chanio Kilindo ek Liam Alcindor in kondann en term 2an Prizon devan Lakour Mazistra Anse Royale, kin ganny sispann pour en peryod 2an avek sakenn en lanmann 7mil 500 roupi, ki zot pour bezwen peye avan le 25 Novanm 2025, kot si zot pa peye zot pour deservi en term 6 mwan Prizon.

Kilindo ek Alcindor ti komet sa lofans le 27 Oktob 2024, dan distrik Anse Aux Pins, kot zot ti vol en scooter, e plitar lapolis ti reisi rekiper sa scooter ki tin ganny raporte vole.

Enrique Maringo aze 22an sorti Anse Royale, in kondann 2an Prizon, kin ganny sispann pour en peryod 2an, avek en lanmann 7mil 500 roupi. Sa I dan en ka vol.

Maringo ti komet sa lofans le 19 Zen 2022, dan en landwa diverstisman Au Cap, kot I ti vol en sonm larzan dan en lofis, dan sa letablisman.

Darius Talma aze 24an sorti Beau Vallon, in kondann 6an Prizon devan Lakour Siprenm. Dan 3 ka, pour lofans an posesyon en drog kontrole.

Ziz ki ti pe ekout sa ka ti kondann Talma en term 6an Prizon dan premye ka, pour lofans an posesyon en drog kontrole. Sa ti 819.8 granm Heroin (Diamorphine), dan dezyenm ka en term 2an 6 mwan Prizon, pour lofans an posesyon en drog kontrole, sa ti 361.7 granm kanabis, e dan twrazyenm ka touzour pour lofans an posesyon en drog kontrole 79.4 granm kanabis, Talma in kondonn en term 1an Prizon. E Ziz in ordonnen ki letan ki in fer lo rimann I ganny dedwir lo son santans, e ki son santans I mars ansanm, ki fer I pour selman fer 6an Prizon.

Talma ti komet sa lofans le 19 Me 2025, apre ki lapolis tinn fer lafouy kot son rezidans Beau Vallon, kot sa bann drog kontrole tin ganny dekouver e sezi dan son lasanm.

I enportan note, ki dapre gidans pour santans, pour bann ka lofans relye ek drog, ki osi pour an posesyon en drog kontrole valer 600 granm Heroin ou plis, I posiblenman kapab anmenn en santans 20an Prizon ou menm Lavi Prizon.

Lapolis Sesel an kolaborasyon avek Lotorite License Sesel e biro Eleksyon pe enpoz serten restriksyon konsernan lavant lalkol zour eleksyon, le 27 Septanm, 2025. Sa restriksyon pou pran lefe depi 11er diswar Vandredi le 26 Septanm,2025 e termin 8er edmi bomaten Dimans le 28 Septanm 2025, amwen ki lotorite i deside agrandi sa ler lo restriksyon lavant lalkol. Sa restriksyon i aplikab lo Mae, Pralen e La Dig.

Sa restriksyon i pou tou vander laboutik, operater bann bar piblik ki enkli bann bar ki vann kalou, lapire e baka, bann landrwa divertisman parey "Casino",bann landrwa lanmizman parey "discotheques" e menm bann landrwa ki annan bann manm anrezistre.

Sa mezir pe ganny met anplas pou ki sa eleksyon i deroul dan lord e lape e kot tou sitwayen i kapab egzers son drwa avek en konsyans kler.

Parkont, sa restriksyon pa aplik pou bann lotel e "guest house" e lezot akomodasyon touristik. Zot kliyan ki pe reste dan sa bann letablisman pou kapab konsonm lalkol zis dan premiz sa bann letablisman. Manm piblik pou napa drwa al konsonm lalkol lo oken bar kot okenn sa bann letablisman kin ganny mansyonnen pli o. Manm piblik e bann dimoun ki annan sa bann biznes pe ganny demande pou respekte sa regilasyon.

T.Barbe (Mr.)
Komisyoner Lapolis Sesel