4 zofisye sorti dan servis piblik ki reste dan rezyon Anse Boileau, Anse Aux Pins, Anse Etoile e La Retraite. In pas devan lakour kot zot in ganny rimann an detansyon lapolis ziska le 1 Zen 2023. 

Sa 4 zofisye i sispe dan en ka ki lapolis pe fer lanket ladan apre ki en gran kantite prezimen lavyann torti e pti torti vivan ti ganny dekouver abor en avyon ki zot ti lo la ki tin fek ariv Mahe yer bomaten.

4 zofisye sorti dan servis piblik ki reste dan rezyon Anse Boileau, Anse Aux Pins, Anse Etoile e La Retraite. In pas devan lakour kot zot in ganny rimann an detansyon lapolis ziska le 1 Zen 2023. 

Sa 4 zofisye i sispe dan en ka ki lapolis pe fer lanket ladan apre ki en gran kantite prezimen lavyann torti e pti torti vivan ti ganny dekouver abor en avyon ki zot ti lo la ki tin fek ariv Mahe yer bomaten.

En madanm 70an sorti Point Aux Sel in ganny atake e vole dan son lakaz ozordi granmaten.

Lapolis ti ganny alerte lo sa lensidan ver 9er 20 bomaten. O moman sa lensidan sa madanm ti tousel kot son lakour letan ki 2 zonm arme dan mask ti fors zot larantre dan son lakaz e servi vyolans pou atake li kot zot in vol serten lekipman elektronik e larzan. Anrezilta sa lensidan sa madanm in resevwar serten dimal kin nesesit swen medikal. 

Lapolis pe lans en lapel avek okenn endividi ki annan lenformasyon kredib lo sa lensidan pou pran kontak avek zofisye CID Anse Royale lo 4372050 e manm piblik pe ganny konseye pou osi servi nou lanir dirzans 999/112 ou 133 a okenn moman ki zot bezwen led imedyat.

En garson 20an e lot 21an toulede sorti La Misere in formelman ganny sarze devan lakour ozordi dan 2 ka pou lofans kas lakaz e vole.

Sa aprezan akize 21an in ganny sarze dan en ka kas lakaz e vole raporte avek lapolis le 28 Avril 2023 ki ti arive La Misere. Dan sa enn ka lakour in larg li lo plizyer kondisyon enkli en kosyon larzan 5mil roupi pou son laliberte provizwar e en kovrefe depi 6er diswar ziska 6er bomaten sa i si i arive pey son kosyon larzan pou li ganny large.

Dan en lot ka en zonm 20an osi sorti La Misere in ganny sarze dan en ka vol ansanm avek sa premye akize 21an ki ti ganny raporte avek lapolis le 3 Me 2023. Lakour in larg sa 2 akize dan sa enn ka lo plizyer kondisyon ki osi enkli en kosyon 5 mil roupi sakenn ki zot pann reisi akord demann lakour ki fer zot rimann andetansyon Servis Prizon Sesel. 

Sa 2 akize pou repas devan lakour le 1 Zen 2023.

En Fiy 16an ek en garson 21an sorti Cascade in pas devan lakour mazistra Anse Royale ozordi bomaten kot zot in ganny rimann pou 14 zour andetansyon lapolis pou lofans lesey vol an servan vyolans ki ti arive le 3 Me dan distrik Cascade.

Sa I apre ki lapolis ti ganny alerte pou lasistans par en zonm dan son 50 tenn lannen apre ki 2 dimoun tin antre dan son lakaz e fer lesey pou vole an servan vyolans. Sa zonm ti resevwar lasistans medikal kot lopital Sesel apre plitar ganny large.

Antretan lapolis I kontinyen avek son lanket dan sa enn ka. 

En zonm 37an apele Marcus Zelia sorti La Retraite in ganny dekouver pa pe reazir ater obor semen Curio Road apre ki in sispekte tonbe sorti dan en pye dibwa.

Lapolis in komans en lanket dan sa ka annatandan rapor rezilta letopsi pou determin lakoz ekzakt son lanmor.

Zofisye lapolis Rezyon Nor asiste par zofisye ansarz bann stasyon, pilot drone pou lapolis, Dog Unit, 2 sivilyen Msye Malik Labonte e Christian Lionnet osibyen ki Seychelles powerboats & jetskis association tin mont en loperasyon sekour la aswar Anse Major. 

Sa i apre ki lapolis tin resevwar en call dirzans kot en group dimoun tin rankontre difikilte lo trail. En madanm 52an tin ganny transporte lopital Sesel pou en tyek medikal.

Gard Lakot Sesel in ozordi apremidi antre dan por avek en Dhow Iranyen kot lo la i annan en gran kargezon sispekte drog ilegal kin ganny dekouver ki fer en total 53 goni.

Abor sa Dhow ti annan 7 manm lekipaz enkli kapten zot aze ant 27an a 63an. Toule 7 manm lekipaz in ganny arete e pe ganny detenir andetansyon lapolis.

Antretan lapolis pe kontinyen avek son lanket dan sa enn ka.

Lapolis in raporte ki Hubert Delcy aze 35an sorti Beolier in mor, prezimen koze par blesir grav ki in gannyen lo plizyer parti son lekor ozordi granmaten Beolier. Sa i swivan en komosyon e bagar ant li ek en group dimoun. 

En zonm 23an ek enn 42an toule de sorti Anse Boileau ek en zonm 27an sorti Barbarons in ganny arete e pe detenir an koneksyon avek sa lensidan.

Lapolis ti ganny alerte lo sa lensidan ver 1er 10 bomaten. Lanket I an progre pou etablir sirkonstans ekzakt otour sa prezimen ka mert.

En madanm 38an sorti Grand Anse La Digue in ozordi bomaten formelman ganny sarze devan lakour mazistra Pralen pou sa bann lofans swivan 2 ka trespas kriminel, 1 ka lesey pou kas lakaz e vole e 1 ka vol an servan vyolans.

Lakour tin enpoz en kosyon larzan lo sa aprezan akize kot i ti pou bezwen pey 10 mil roupi dan sak ka ki fer en total 40 mil roupi pou son laliberte provizwar. Sa akize pann reisi akord demann lakour ki fer i ganny riman prizon Montagne posse ziska le 11 Me 2023 zour ki i ekspekte repas ankour.