Lapolis in komans en lanket detaye, dan en lensidan kin ganny raporte ozordi granmaten ver 5er 58, arive dan rezyon Beau Vallon dan kontour Laflit, kot en transpor ki ti pe fer direksyon Beau Vallon, ti fer kolizyon avek en transpor lapolis ki ti lo patrol ki ti pe fer direksyon ver Pascal Village.

Anrezilta sa aksidan sa drayver pann arete e in kontinyen ale, kot plitar lapolis in entersepte sa transpor dan rezyon Anse Mazor ki tin andomaze, kot drayver sa transpor ti ganny sans taye, 1 parmi sa 2 pasaze ki ti dan sa transpor. In ganny transporte kot Sant Lasante Larivyer Anglez pou swen medikal dirzans anrezilta dimal ki I tin resevwar lo en parti son lekor. Dapre rapor ki lapolis in resevwar sa transpor in preziman ganny vole dan rezyon Mont Fleuri.

Departman Lapolis

Lapolis in reisi idantifye propriyeter, e remet son 3 German Shepherd dan son posesyon, ki tin ganny trouve ozordi granmaten dan rezyon Au Cap presizaman dan zanmerant Reef Holiday Home Apartment pe vir vire lo semen dan sa zanmerant.

Sa I vin apre ki lapolis tin resevwar en rapor ozordi bomaten, ki en lakaz tin ganny kase dan zanmerant Turtle Bay, Au Cap. Letan bann zofisye lapolis tin reponn lapel pou lasistans, swivan lenformasyon resevwar ki 3 German Shepherd ti osi manke.

Lapolis I salye aksyon son bann zofisye, pou ranmas sa 3 German Shepherd met zot dan en lokasyon sekirize, ziska ki zot in reisi idantifye son propriyeter.

Departman Lapolis

Lapolis pe raporte ki i annan en aksidan narive Au Cap, e i annan dimoun kin ganny dimal. Viktim sa aksidan pe ganny transporte lopital Anse Royale pou swen medikal.

Plis detay dan en prosen kominike.

Departman Lapolis

Sandrick, Trevor Ladouce aze 36an ki travay koman en zournalye, sorti La Passe, La Digue. In formelman ganny sarze devan Lakour Mazistra Mahe dan en ka okazyonn dimal grav en endividi, kin resaman arive lo La Digue, kot I ti koz dimal grav en zonm 59an ki osi sorti La Digue, ki ankor admit lopital Sesel anrezilta sa lensidan.

Mazistra ki ti pe ekout sa ka, in ordonnen ki sa akize I ganny garde lo rimann andetansyon Lapolis, pou ankor 14 zour, ziska le 4 Desanm 2024. Sa, set akoz natir sa lofans e gravite dimal ki sa viktim in gannyen.

Departman Lapolis

Ronbert Joseph aze 21an sorti North East Point. In formelman ganny sarze devan Lakour Mazistra dan en ka vole dan Lakaz.

Mazistra ki ti pe ekout sa ka, in larg Ronbert lo sa bann kondisyon swivan; kot I pou bezwen pey en kosyon 8mil roupi pou son laliberte provizwar, pou sinny Liv Lakour 3 fwa par semenn dan Kordgard Perseverance, pou pa komet ou ganny sarze avek okenn lofans similer pandan letan ki I pou deor lo laliberte provizwar.

Ronbert pann reisi akord demann Lakour, pou pey sa kosyon 8mil roupi, ki fer I aprezan ganny rimann Prizon Montagne Posse. Si I arive pey sa kosyon 8mil roupi I pou ganny large, e I pou bezwen sivre sa bann kondisyon swivan.

Departman Lapolis

En zonm 30an ki pa dan en lanplwa Sorti Belonie, in ganny rimann 14 zour andetansyon Lapolis koman sispe dan en seri ka vol kin resaman arive dan rezyon Lavil.

Sa sispe I ekspekte repas devan Lakour le 4 Desanm 2024.

Departman Lapolis

En garson 25an Sorti Curio Road, Bel Air in ganny rimann 11 zour andetansyon Lapolis koman sispe dan en ka ki lapolis pe fer lanket ladan pour lofans menas an servan vyolans.

Lapolis ti ganny alerte lo 2 lensidan separe, arive le 11 ek 16 Novanm 2024, kot sa sispe ti menas son konpanny an servan vyolans.

Departman Lapolis

Zofisye Lapolis, zofisye Lazans Servis Tenny Dife Ek Softaz baze lo Praslin, asiste avek en sivilyen. In ozordi apremidi reponn lapel dan santye Mont Plasir, Grand Anse Praslin pou asiste en viziter etranze ki tin raporte ganny serten dimal dan sa santye letan ki I ti pe tras sa santye.

Sa bann zofisye ti donn sa viziter premye swen dirzans sirplas, avan ganny transporte pour swen medikal kot sant Lasante Baie St Anne Praslin. Lapolis ti ganny alerte lo sa lensidan ver 12:47 apremidi, ti ver 4er 50 apremidi ki sa loperasyon ti terminen. Sa viziter pe ganny transfer Mahe pou swen medikal pli spesyalize.

Departman Lapolis

En garson 23an sorti Eden Village, Roche Caiman in ganny dekouver pa pe reazir kot son rezidans ozordi bomaten. Lapolis ti ganny alerte ver 8er 40 bomaten pou lasistans.

Lapolis in komans en lanket detaye dan sa enn ka annatandan rapor rezilta letopsi pou determin lakoz e sirkonstans otour son lanmor.

Departman Lapolis