Lapolis I konfirmen ki sa aksidan fatal Anse Royale yerswar i fer 5yenm ka fatal ki ganny rikorde pou 2024, non pa 4yenm ka fatal parey tin ganny anonse dan en kominike yerswar.

Sa aksidan ti ariv dan plato Anse Royale, ant en moter ek en loto. Viktim sa aksidan i en garson 24an sorti Sweet Escote dan distrik Anse Royale.

Dapre rapor inisyal ki lapolis in ranmase, sa garson ki ti lo en moter tin sorti direksyon ver Sweet Escote pou al Anse Royale letan ki I ti fer kolizyon avek en transpor ki tin park akote semen. An rezilta sa kolizyon in sibir dimal grav lo plizyer parti son lekor, kot I ti ganny sertifye mor plitar annarivan Lopital Sesel.  

Lapolis ti ganny alerte lo sa aksidan ver 9er 35 diswar, e en lanket in komanse dan sa enn ka annatandan rapor rezilta letopsi.

Departman Lapolis

Lapolis in komans en lanket detaye dan en lensidan kot 3 zonm ek 1 fanm aze dan zot 30 tenn lannen, sorti Corgate Estate dan distrik Mont Fleuri ti ganny transporte lopital Sesel pou swen medikal dirzans. 

Lapolis ti ganny alerte lo sa sitiasyon ver 8er diswar, sa I pandan ki en group zofisye Lapolis ti pe fer patrol dan Corgate Estate, zot ti ganny averti ki 4 endividi tin prezimen konsonm kek sibstans danzere e zot ti bezwen lasistans.

Toule 4 endividi in admit lopital Sesel e zot kondisyon I stab.

Departman Lapolis

GB en zonm 47an ki ti en ansennyan P.E lekol BV Segonder sorti Bel Air in kondannen dan 3 ka.Sa I pou lofans labi seksyel lo en miner. 

GB ti komet sa lofans le 26 Desanm 2019, e pandan mwan May 2020 dan plizyer lokasyon, kot I ti seksyelman abiz son viktim ki ti aze 14an a sa letan. Ziz ki ti pe ekout sa ka in kondann GB 10 an Prizon dan toule 3 ka, ki fer en total 30an Prizon, me in ordonnen ki son santans I mars ansanm ki fer I pou aprezan fer zis 10an Prizon.

Departman Lapolis

Jimmy, Roy Azemia sorti Glacis in kondannen dan 2 ka.

Sa I pou lofans konplo avek lentansyon pou komet en aksyon teorism e an posesyon eksplosiv. Dan premye ka Azemia in kondann 8an Prizon e dan dezyenm ka in kondann 4an Prizon.

Ziz ki ti pe ekout sa ka in ordonnen ki santans Azemia I mars ansanm e letan ki in fer lo rimann I ganny konte lo sa santans. 

Dezyenm akize dan sa ka Andrew Estrale sorti Maldives in osi kondannen dan 2 ka. Sa I pou lofans konplo avek lentansyon pou komet en aksyon teorism e an posesyon eksplosiv. Dan premye ka Estrale in kondann 7an Prizon e dan dezyenm ka in kondann 4an Prizon . 

Ziz ki ti pe ekout sa ka in ordonnen ki santans Estrale I mars ansanm e letan ki in fer lo rimann I ganny konte lo sa santans. 

Departman Lapolis

Nellie Kawinga aze 39an Sorti Malawi in kondannen dan en ka lenportasyon en drog kontrole. 

Kawinga ti ganny arete lo Erport Enternasyonal Sesel apre son larive le 8 Oktob 2023, an posesyon 874.33 granm Cocaine dan 74 “Cylindrical Shape Packets”.

Konseye legal madanm Kawinga ti demann lakour dan son pledwari pou pran konsiderasyon letan ki en santans pe ganny enpoze lo sa akize, pou en “Custodial sentence”, viki I tin pled koupab a son premye lestan kan I tin ganny loportinite kot I pann gaspir letan Lakour, e sa akize ti refer sorti ki I annan 4 zanfan, I en manman tousel, I tin ganny menas e forse pou anganze dan sa trazaksyon ilegal kot I ti voyaz Letyopi ek Kenya avan ki ti ariv son destinasyon final Sesel. 

La ziz ki ti pe ekout sa ka, letan ki I ti pe delivre son santans, I ti fer refer sorti ki problenm drog I tre alarman Sesel, i en kanser ki pe anvair nou bann zenn e ki pe fer zot depandan lo drog. Pei I bezwen tre konsernnen kont sa lalit kont drog. I ti osi refer sorti ki wi lakour I bezwen pran serten konsiderasyon dan serten ka, me ki zot osi bezwen regard natir e severite, sa krim ki pe afekte lakominote, e I ti fer sorti ki sa I en mesaz kler ki lakour pe pase. En tel lofans parey pa pe ganny tolere e ki lakour pa pou montre remors anver sa bann akize, zot rekonnet ki akoz sa bann askyon en gran parti lakominote pe soufer avek sa fleo drog. 

Ziz ti enpoz en santans 15 an Prizon lo Nellie Kawinga, e in ordonnen ki sa akize pa ganny remisyon lo son santans akoz natir e gravite sa lofans ki in komet.

Departman Lapolis

Manm piblik pe ganny enformen ki lapolis pe kontinyelman resevwar bann rapor lensidan bann loder drol partikilyerman kot bann lekol lo Mahe, e osi byen ki serten bann lenstitisyon Gouvernman.

Lapolis pe egalman travay an kolaborasyon avek bann lazans konsernen, pou rod sours sa bann loder e determin son vre lakoz.

Antretan lapolis pe demann manm piblik pou reste kalm e pli virzilan pandan sa moman. Lapolis pe egalman demann manm piblik ki annan kek lenformasyon ou ki vwar okenn aktivite drol ou sispekte dan zot zalantour, pou raport avek lapolis imedyatman atraver nou lanir anonim 133, ou atraver nou sant komann lapolis lo 4288000/ 4288042 ou atraver bann platform lapolis lo rezyo sosyal. 

Lapolis pe reasir manm piblik ki tou lenformasyon ki ganny resevwar pou ganny trete avek konfidansyalite, e ki sa bann lensidan pe ganny trete tre serye.

Departman Lapolis

Andy Reginald aze 47an sorti dan distrik Port Glaud in kondann 6 mwan Prizon pou lofans vole. Reginald ti konmet sa lofans le 9 Mars 2021 dan zanmerant Huteau Lane. Lakour in ordonnen ki letan ki in fer lo rimann I ganny dedwir lo son santans.

Departman Lapolis

Dereck, Michel Nourrice in kondann 5 mwan Prizon me son santans i ganny sispann pou en peryord 2an. Sa i pou lofans Koz dimal en dimoun ki ti arive le 6 Mars 2023 ver 1er apremidi lo Por Lapes Providans. Lakour in ordonnen ki sa aprezan kondannen I ganny refer avek servis probasyon pou swiv en progranm “Anger Management”.

Departman Lapolis

Wit ( 8 ) zonm in formelman ganny sarze ki enkli Sa 6 sispe ki ti deza lo rimann andetansyon lapolis pou sa bann lofans swivan sa i,

* Being in possession of anything intended to be used for the purpose of witchcraft.

* Conspiracy to exercise in witchcraft non-natural and superstitious mean.

* Counselling and procuring another person in exercising, witchcraft non-natural and superstitious mean.

* Soliciting any person to advise him on any matter for the purpose whatsoever by witchcraft, non-natural or other superstitious means.

Lapolis atraver prosekisyon in anmenn en total 53 sarz kont sa bann aprezan akize. Akize nimero enn I Ali Ali Said avek nasyonalite Tanzanian ki pe fer fas avek 22 sarz kont li, Dezyenm akize Simon Dine, aze 62an sorti Reef Esate pe fas avek 18 sarz kont li, Twazyenm akize Jules Radegonde aze 58an sorti La Digue I annan 4 sarz kont li, Katriyenm akize Bashir Umarji aze 48 an sorti Quincy Village 3 sarz,, Senkyenm akize Marcel Naiken aze 49 an sorti Baie Lazare 2 sarz, Sizyenm akize Yvon Legaie aze 54an sorti Ma Joie 2 sarz kont li, Setyenm akize Kenette Evenor aze 44 an sorti Grand Anse Mahe 1 sarz e Msye Patrick Herminie 60an sorti Mont Buxton 1 sarz kont li. 

Mazistra ki ti pe ekout sa ka in ordonnen ki sa zonm Tanzanian I ganny garde lo rimann andetansyon Servis Prizon Sesel ziska le 16 Oktob 2023, kot I pou repas ankour e sa 7 lezot akize, zot in ganny large lo plizyer kondisyon kot parmi zot in sinny en ‘Bail Bond’ 30 mil roupi sakenn koman en garanti pou sekiriz zot prezans pou aparet ankour, remet tou zot dokiman vwayaz avek lakour plitar ozordi 3er apremidi e pou pa ganny sarze ou komet okenn lofans similer pandan letan ki zot deor lo laliberte provizwar. 

Sa ka pou repas devan Lakour Mazistra le 2 Novanm 2023.

Departman Lapolis