En garson 10an sorti Anse Aux Pins in ganny transporte lopital Sesel pou swen medikal. Sa i anrezilta en aksidan kot in ganny tape avek en loto dan zanmerant apre larantre Stad Popiler.

Lapolis ti ganny alerte lo sa aksidan ver 2er 53 apremidi. In etablir ki sa transpor ti pe fer direksyon lavil o moman sa aksidan.

En lanket in komanse dan sa enn ka.

En garson 20an sorti Petit Paris in ganny transporte klinik Les Mamelles pou swen medikal dirzans plitar refer lopital Sesel anrezilta en aksidan moter kin arive Petit Paris.

Lapolis ti ganny alerte lo sa aksidan ver 12:35 apremidi. In etablir ki sa moter ti pe fer direksyon lavil o moman sa aksidan.

En lanket in komanse dan sa enn ka.

Alberto Rosette aze 54an sorti Sweet Escote dan distrik Anse Royale i ganny dekouver lo lans Anse Royale ozordi bomaten kot i pa ti pe reazir.

Lapolis ti ganny alerte lo sa dekouvert ver 6er 50 bomaten deswit bann zofisye ti reponn lapel lo scene. Msye Rosette ti ganny sertifye mor sirplas lo scene par patolozis lapolis.

En lanket in komanse dan sa ka annatandan rapor rezilta letopsi pou determin lakoz e sirkonstans otour son lanmor.

En zonm 26an sorti Cascade ki pa dan lanplwa in formelman ganny sarze devan lakour Mazistra Anse Royale ozordi pou 2 ka lofans vole.

Mazistra in enpoze en kosyon larzan lo sa aprezan akize dan toulede ka separeman ki fer en total 11 mil 500 roupi pou li kapab ganny large lo laliberte provizwar.

Sa akize pann reisi akord demann lakour ki fer i aprezan ganny rimann prizon Montagne Posse ziska le 9 Me 2023 zour ki i ekspekte repas ankour.

En madanm 46an sorti dan les Mahe ek en zonm 36an avek nasyonalite Bangladeshi in ozordi bomaten formelman ganny sarze devan lakour siprenm pou lofans leksplwatasyon osibyen ki pour akt endesan e labi seksyel kont zanfan miner. 

Lakour in ordonnen ki sa aprezan 2 akize i ganny rimann an detansyon lapolis ziska le 9 Me 2023 zour ki zot ekspekte repas ankour.

En zonm 30an sorti Fond B'Offay

Praslin in admit lopital Sesel yerswar anrezilta en aksidan moter kin arive Praslin e son kondisyon in ganny dekrir koman stab.

Lapolis ti ganny alerte lo sa aksidan ver 9er 40 diswar dapre rapor sa zonm ti pe mont en moter kot in tap avek en pye dibwa e ganny dimal ase serye lo serten parti son lekor. I ti ganny transporte lopital Baie St Anne Praslin pou premye swen answit ganny transporte Mahe pou swen medikal pli spesyalize.

En lanket in komanse dan sa ka pou etablir sirkonstans otour sa enn aksidan. 

Lakour siprenm in ozordi bomaten komans ekout en ka Omisid envolanter (Manslaughter) ki ti arive le 11 Out 2019 Ile Soleil dan distrik Anse Aux Pins kot viktim 

Lenny Marcel aze 15an sa letan ti perdi son lavil dan en lensidan trazik.

Akize dan sa ka i en zonm dan son 40an tenn lannen i sorti Mont Plasir dan distrik Anse Royale ki tin formelman ganny sarze devan lakour Siprenm an Zen 2022. Sa akize ti travay koman en sekirite a sa letan lo Ile Soleil. Sa ka i ekspekte ekoute pandan sa semen antye.

Lapolis i rikord 3 yenm aksidan fatal. Viktim sa aksidan fatal i en fiy 24an apele Heidi Domingue sorti Belveder dan distrik Mont Fleuri ki ti pasaze dan en transpor.

Drayver sa transpor en fiy 25an sorti Anse Royale in admit lopital Sesel ek 1 son pasaze fiy aze 25an sorti rezyon Nor Mahe toulede zot kondisyon in ganny dekrir koman stab. Tandis ki en fiy 25an sorti La Gogue ki ti osi pasaze li in resevwar tretman apre plitar ganny large.

Sa transpor ti pe fer direksyon Providans ansortan ver Lavil o moman sa aksidan. Lapolis ti ganny alerte lo sa aksidan ver 9er 50 diswar e en lanket in komanse pou etablir sirkonstans otour sa aksidan.

Lapolis lo Pralen in mont en loperasyon resers ek sekour ansanm avek zofisye medikal dan santye Mont Plasir pou al ver Anse Georgette.

Sa i vin apre rapor ki lapolis ti resevwar ki en viziter avek nasyonalite Alman in rankontret serten difikilite pandan letan ki in lo " Trail " anrezilta kot son kondisyon tin agrave e nesesit swen medikal dirzans. In ganny transportre lopital Baie St Anne pou swen medikal pli spesyalize 

En zonm 48 an sorti Capucin dan distrik Anse Aux Pins in ganny rimann andetansyon lapolis ziska le 5 Me 2023 zour ki I ekspekte repas ankour.

Sa zonm I sispe dan en ka kas lakaz e vole kin arive tou resaman dan distrik Anse Aux Pins kot plizyer lekipman eletronik in ganny raporte vole. Serten parmi sa bann lekipman kin ganny raporte vole lapolis in reisi rekipere.

Antretan lapolis I kontinyen avek son lanket dan sa enn ka.