Kominike

Patrick Sedgrick aze 40an sorti Union Vale, in formelman ganny sarze devan Lakour Mazistra Ile Du Port, ozordi apremidi. Sa i dan en ka vol, e obtenir larzan lo fo pre teks.

 

Mazistra ki ti pe ekout sa ka, in larg Sedgrick lo sa bann kondisyon swivan; kot in sinny en "Bail Bond" 10mil roupi, dan sakenn sa bann ka, ki fer en total 20mil roupi, pou sinny liv Lakour dan kordgard Beau Vallon 3 fwa par semenn e pou pa komet ou ganny sarze avek okenn lofans similer pandan letan ki I deor lo laliberte provizwar. 

 

Sedgrick ti komet sa lofans le 21 Zilyet 2025, kot I ti vol laptop, e larzan en koup etranze ki ti lo vakans Sesel, e le 23 Zilyet 2025 kot I ti osi obtenir larzan lo fo pre teks, touzour avek en viziter etranze ki ti lo vakans Sesel. 

 

Lapolis in reisi rekiper serten propriyete ki tin ganny raporte vole dan sa bann ka.