Central Police HQVictoria, Mahe
Emergency Only 999
Communique (350)
Lapolis in raporte ki en zonm 21 an kin donn son ladres koman Bevedere avek en lot 26 an ki reste Anse Norde in ozordi ganny rimann prizon Montagne Posee an koneksyon avek plizyer lofans tel ki kas lakaz, kas batiman e vole osibyen ki pou vole lo lans e vol transpor. I egalman annan lofans sove an detansyon legal kin ganny anrezistre kont sa 2 zonm.
Mazorite lofans kont sa 2 dimoun in raporte arive dan rezyon Mont Fleuri ek Sid Mahe tou dernyenman.
Lapolis pe antretan kontinnyen avek son lanket dan sa bann ka kot zot ekspekte ganny sarze byento.
Lapolis in raporte ki apre 14 zour rimann, en zonm 31 an ki reste Belvedere in formelman ganny sarze devan lakour Mazistra yer Mardi le 18 Zanvye pou lofans vol. Premye ka ti ariv dan en laboutik Rochon le 26 Novanm lannen pase tandis ki lot ti dan en laboutik Hermitage le 3 Zanvye sa lannen kot sa akize ti vole e tay avek pers larzan son 2 viktim.
Sa akize ki pann kapab zwenn serten kondisyon ki Mazistra tin enpoz lo li pou son liberte provizwar pe kontinnyelman reste lo rimann pou li aprezan repas ankour le 1 Fevriye.
Lapolis pe ansemoman kontinnyen avek lanket kont sa menm akize ki osi sispe dan 3 diferan ka kas lakaz e vole Belvedere ek Copolia raporte Kordgard Mont Fleuri le 29 Desanm lannen pase e 1 Zanvye sa lannen.
Lapolis in raporte ki lekor Danny Barrack, sa zonm 39an sorti Bougainville ki tin ganny raporte manke yer par son fanmir in ganny dekouver Sanmdi bomaten. Sete swivan en loperasyon resers par zofisye lapolis ki lekor Danny ti ganny dekouver pe flote dan en landwar apele dan Sours dan distrik Baie Lazare ver 7:05 bomaten.
En zonm 27 an sorti ‘dan fatak’ dan distrik Baie Lazare in ganny anmenn ankour kot in rimann pou 14 zour antretan ki lapolis I kontinyen avek lanket dan 2 ka vol kin arive lo lans Lentandans tou dernyenman.
Premye ka ti ganny raporte avek lapolis le 11 zanvye 2022 ver 5:40 apremidi e lot ka yer le 13 Zanvye ver 6:50 diswar. Toule 2 ka ti ganny raporte kordgard Quatre Bornes dan distrik Takamaka.
Dan sa ka yer swar, mazorite lobze personnel ki tin ganny raporte vole in ganny rekipere sof larzan.
Sa sispe ti ganny arete yer swar menm par zofisye lapolis avek lasistans en sivilyen dan rezyon lentandans kot sa sispe ti fizikman agres sa zofisye pandan ki ti pe reziste larestansyon.
Swivan konsern kin leve lo kondisyon dan ki leta kaso santral I ete, lo kalite tretman ki bann deteni e rimann pe fer fas avek, prensipalman an relasyon avek konplent par sa dezyenm akize avek son avoka devan lakour le 07 Zanvye sa lannen e osi rapor soumet par komisyon drwa imen, lapolis pe fer sorti sa kominike pou donn son pwennvi lo sa sitiasyon.
Lapolis I rekonnet ki I annan defayans avek serten son bann fasilite detansyon dan serten son bann stasyon lapolis e ki ansemoman i napa en sant detansyon spesifik zis pou rimann. Avek logmantasyon dan krim e nivo deteksyon kin ogmante, lapolis I vwar li pe arete, deteni e rimann plizyer sispe dan son bann fasilite kot zot bezwen ganny plase dan diferan kaso dan bann stasyon antretan ki lanket I kontinyen ziska zot ganny sarze.
Baze lo rapor komisyon drwa imen e lord lakour dan en ka ki pe ganny ekoute, komisyoner lapolis in fini apwent en komite kat (4) dimoun kin komans visit son bann fasilite detansyon dan bann stasyon e zot in komans soumet rapor e rekomandasyon avek li.