Central Police Headquarters, Victoria
Mon - Fri: 8.00 am to 4.00 pm.
Emergencies
999.
Crime Sropper
133

Communique

Kominike

Trwa zonm, enn 50an ki deza en kondannen, enn 49an sorti Les Canelles e lot 35an sorti Maldives in ganny rimann 14 zour andetansyon lapolis. 
 
Sa 3 zonm i sispe dan serten ka ki lapolis pe fer lanket ladan, pour bann lofans relye avek Trafik imen, konplo pour enport en drog kontrole e blansisarz larzan. 

Kominike (Santans)

En zonm 29an sorti dan Les Mahe, in kondann 8an Prizon dan en ka labi seksyel lo en miner. 
 
Sa kondannen ti komet sa lofans pandan lannen 2023, dan rezyon Les Mahe kot I ti seksyelman abiz en fiy ki ti aze 13an a sa letan. Ziz ki ti pe ekout sa ka, in pran plizyer konsiderasyon avan pas santans lo sa kondannen, tel ki I tin pled koupab a son premye lestan kan I tin ganny loportinite kot I pann gaspir letan Lakour. 

Kominike

En zonm 39an sorti Point Aux Sel dan distrik Au Cap, in prezimen noye dan lanmer Point Aux Sel ozordi swar.
 
Dapre rapor inisyal ki lapolis in ranmase, sa zonm ki ti avek detwa son bann koleg tin al dan delo sale, kot a en moman donnen son bann koleg pann vwar li re monte, kot zot ti apersevwar li pe flote dan lanmer. Zofisye Lapolis ki tin reponn lapel pour lasistans ti administre premye swen dirzans CPR sirplas, avan ki sa viktim ti ganny transporte kot lopital Anse Royale pour swen medikal entansif. 
 
Lapolis ti ganny alerte lo sa lensidan ver 6er 50 diswar pour lasistans. E en lanket in komanse dan sa enn ka pour etablir sirkonstans otour son lanmor annatandan rapor rezilta letopsi. 

Lanons Semen Frenmen

Motoris pe ganny enformen ki semen depi dan Ron Pwen Providence pour al Highway ver Erport, e semen dan Ron Pwen Erport pour al ver Highway Providence, pour konpletman frenmen demen Vandredi le 7 Novanm 2025, aparti 9er bomaten, ziksa plitar apremidi.  
 
Sa pou permet lapolis ek lezot lazans konsernen fer en travay "survey" an relasyon avek sa 8 tyenm ka aksidan fatal ki ti arive le 3 Oktob 2025.
 
Motoris pe ganny averti pou servi semen alternativ par Cascade pour ariv zot destinasyon.
 
Departman lapolis i demann korperasyon bann motoris, avek son bann zofisye ki pou lo semen.

Kominike

Manm piblik pe ganny enformen ki Carpark Gymnasium pour konpletman frenmen demen Zedi le 6 Novanm 2025. 
 
Motoris pe ganny konseye pou servi lezot Carpark, alternativ dan Lavil. Departman Lapolis I regrete okenn lenkonvenyans ki sa I kapab koze e pe kont lo zot sipor.

Kominike

Departman Lapolis pe notifye bann zabitan Praslin, ki aparti ozordi Merkredi le 5 Novanm 2025, ant 9er bomaten a 4er apremidi, pour 3 semenn, bann zofisye dan Younit spesyalize POTRU e Lafors Defans Sesel pour pe entreprann serten travay pour demoli bann leksploziv kin ekspire lo sit UCPS La Point, Praslin.
 
Manm piblik pe ganny avertir pour strikteman pa apros sa lokasyon a okenn moman pandan ki sa travay pe ganny fer. Departman Lapolis I kont lo zot sipor e korperasyon pandan sa peryod letan.

Kominike

Jean-Luc Woodcock aze 29an ki en zabitan La Passe, La Digue ki pe reste Corgate Estate dan distrik Mont Fleuri. In formelman ganny sarze devan Lakour Mazistra Ile Du Port dan en ka andomaz propriyete. 
 
Woodcock ti komet sa lofans le 1 Novanm 2025, dan kordgard Beau Vallon kot I ti andmoz serten propriyete dan en kaso. Mazistra ki ti pe ekout sa ka, in larg Woodcock lo sa ban kondisyon swivan; kot in bezwen pey en kosyon 5mil roupi pour son laliberte provizwar, pour pa enterfer avek temwen dan sa ka, pour sinny liv Lakour dan Kordgard Mont Fleuri de fwa par semenn. 
 
Sa ka pour repas devan Lakour le 17 Novanm 2025. Antretan lapolis I kontinnyen avek son lanket dan plizyer lezot ka, kont sa akize. 

Notice

Departman Lapolis pe enform tou endividi, ki tin peye pour fer legzanmen teori dray, ki ti sipoze ganny fer le 27 Septanm 2025, in aprezan ganny reprogranmen pour fer Merkredi le 5 Novanm 2025, menm ler parey zot tin gannyen. Dan lasanm nimero 301 Premier Building, lo Lari Wayal, e zot pe ganny demande pour servi menm resi.

Kominike (Swivi)

En garson 20an sorti Anse Aux Pins in admit dan Younit Swen Entansif Lopital Sesel, dan en leta kritik. E lapolis I ankor pe rod en sispe dan sa enn ka.
 
Sa ti anrezilta en komosyon ki tin arive yerswar Fore Noire, dan distrik Mont Fleuri, kot sa viktim ti ganny pike lo en parti son lekor.
 
Lapolis ti ganny alerte lo sa lensidan ver 8er 5 diswar pour lasistans. Antretan lanket I an progre dan sa ka.

Vizit

Komisyoner Lapolis, Msye Ted Barbe, ti ansanm avek Sou-Lenspekter Julinio Nourrice, zofisye an sarz Younit Relasyon Piblik dan Lapolis, Kaporal Alissa Perine, zofisye lyezon pour Tourizm dan Lapolis ek Msye Dereck Samson, konseye teknik dan lofis Komisyoner Lapolis, ti fer en vizit ozordi apremidi kot Msye Haryl Andre, aze 21 an, kot son rezidans Larivyer Anglez.
 
Sa vizit ti ganny fer apre ki Msye Andre ti fek ganny desarze Lopital Sesel ozordi apremidi. Komisyoner Lapolis ti eksprim son lapresiyasyon e felisitasyon personnelman avek Msye Andre pour son zes brav, remarkab e ranpli avek kouraz pandan de lensidan separe ki ti arive dan lanmer Grand Anse Mahe, yer apremidi.
Additional Images:
1002240535
1002240537

More Articles ...

About

The police force in the Seychelles is a national body which falls under the control of the National Commissioner of Police, who is appointed by the President subject to the approval of the National Assembly....
More

Quick Links

Resources

Contacts

Police Headquarters, P.O Box 46, Victoria, Mahe, Seychelles

Email us on:
info@police.gov.sc

Contact
Phone: 4288000

Privacy Policy

All press release and communique on this website is copyrighted content from the Seychelles Nation, Today newspaper and The Seychelles Police force.

Cookie Policy →

999133