Lapolis pe raporte ki 3 son zofisye in ganny trete apre ganny large pou dimal resevwar lo plizyer parti zot lekor, tandis ki en zonm, sispe dan plizyer ka vol, parmi serten kot vyolans in ganny servi pou komet sa bann lofans, li in refize ganny ekzaminen par lotorite medikal swivan son larestasyon yer swar Anse Norde.

Dapre rapor, sa sitiasyon I an rezilta en loperayson dan mannev par en group polisye pou aret sa sispe dan sa sou distrik Anse Etoile kot manm son fanmiy e lezot endividi vreman agresiv ti entervenir e antre dan konfrontasyon avek gard avek bi anpes sa sispe ganny arete.

Lapolis ti forse servi ‘warning shots’ dan ler pou kapab kontenir sa lafoul dimoun e evantyelman kapab aret sa sispe. Loperasyon e lanket I an progre antretan ki lapolis pe rod lezot sispe enplike dan lagresyon lo son bann zofisye. 

En fiy 17an sorti Le Niole in ganny arete e pe ganny detenir koman sispe dan en lensidan kot en garson 20an sorti Union Vale in ganny pike avek en zouti lo en parti son lekor dan zanmerant Union Vale.

Lapolis ti gany alerte lo sa lensidan ver 2er apremidi en lanket in komanse dan sa ka pou etablir sirkonstans otour sa lensidan.

En garson 20an sorti Cascade avek son frer in resevwar tretman lopital Sesel apre plitar ganny large anrezilta en bagar kot en letablisman diverstisman dan rezyon lavil.

Rapor preliminer ki lapolis in ranmase sa garson 20an ki ti pe asiste pou retir en komosyon ti ganny atake avek en group dimoun arme avek zouti kot in ganny blese enpe partou lo son lekor e son frer li in ganny dimal dan latet. 

Lapolis ti ganny alerte lo sa lensidan ver 6er 25 bomaten en lanket in komanse dan sa lensidan e lapolis pe rod sa bann agreser.

Lapolis pe demann okenn dimoun kin temway en aksidan ozordi bomaten ver 6er a 6er 30 Ma Joie kot en garson 20an in ganny tape lo Bus Stop avek en transpor pou pran kontak avek kordgard Santral lo 4288055 irzan. 

Rapor preliminer ki lapolis in resevwar sa transpor i kouler sann, mark Sirion ki ti pe fer direksyon Lavil o moman sa aksidan.

Lapolis pe egalman fer lanket kont en zonm 27an ki reste Anse Royale apre ki in sispekte servi kart labank en lot dimoun pour retir serten sonm larzan lo son kont. Sa sispe ti ganny arete yer Zedi swivan lenvestigasyon dan ka kot en garson 18an tin fer en rapor “wallet” perdi le 22 desanm dan rezyon lavil. Lanket dan sa ka I kontinnyen.

En zonm 32an sorti Roche Caiman ki pa dan lanplwa in pas ankour ozordi apremidi kot in ganny rimann ziksa le 27 Zanvye 2023.

Sa zonm I sispe dan plizyer ka vol dan rezyon lavil, Sa bann ka I enkli kas transpor, vole lo 2 bato, kas en stor kot serten lekipman bato e lanmizik pour en valer plis ki 150 mil roupi in estimen ganny vole. Lapolis pe kontinyen avek son lanket dan sa bann ka.

En zonm 29an sorti La Passe La Digue in formelman ganny sarze devan lakour mazistra ozordi bomaten pou 2 ka Trespas kriminel. Sa sispe ti konmet sa bann lofans le 4 Desanm 2022 e le 5 Zanvye 2023 lo La Digue menm.

Mazistra in larg sa aprezan akize lo serten kondisyon dan toulede ka tel ki en “ Bail Bond ” 10 mil roupi, pou pa enterfer avek temwen e konplenan dan sa ka, pou pa repet okenn lofans pandan letan ki I deor. Sa akize I ekspekte repas ankour le 25 Zanvye 2023.

En zonm 42an sorti Mont Buxton ki ti ganny bezwen par lapolis koman sispe dan plizyer ka kas lakaz e vole, vole dan laboutik e dan transpor in ganny arete yer tar apremidi dan en loperasyon konzwent dan rezyon Mont Buxton.

Sa sispe in pas ankour ozordi apremidi kot lakour in rimann li prizon Montagne Posse ziska le 26 Zanvye 2023 zour ki I ekspekte repas ankour.

En zonm 57an sorti dan distrik Au Cap in pas ankour ozordi bomaten kot in ganny rimann ziska le 26 Zanvye 2023 zour ki I ekspekte repas ankour.

Sa sispe ti ganny arete yer kot son rezidans an posesyon en drog kontrole osibyen ki en gro sonm larzan. Lapolis I soupsyonnen ki sa sispe ti fer serten aktivite ilegal.

Lanket dan sa ka I kontinnyen.

2 parmi sa 3 sispe zonm ki ti ganny arete Dimans swar dan en lensidan kase e vole dan laboutik batiman “Victoria Arcade” in pas ankour ozordi bomaten kot zot in ganny rimann ziska le 24 Zanvye 2023.

Sa i en zonm 30an e lot 32an toulede sorti dan distrik Perseverance. Sa 3yenm zonm li in ganny large apre pas atraver serten bann prosedir lanket. 

Antretan lapolis pe kontinyen avek son lanket dan sa ka.