Lapolis i rikord 3 yenm aksidan fatal. Viktim sa aksidan fatal i en fiy 24an apele Heidi Domingue sorti Belveder dan distrik Mont Fleuri ki ti pasaze dan en transpor.

Drayver sa transpor en fiy 25an sorti Anse Royale in admit lopital Sesel ek 1 son pasaze fiy aze 25an sorti rezyon Nor Mahe toulede zot kondisyon in ganny dekrir koman stab. Tandis ki en fiy 25an sorti La Gogue ki ti osi pasaze li in resevwar tretman apre plitar ganny large.

Sa transpor ti pe fer direksyon Providans ansortan ver Lavil o moman sa aksidan. Lapolis ti ganny alerte lo sa aksidan ver 9er 50 diswar e en lanket in komanse pou etablir sirkonstans otour sa aksidan.

Lapolis lo Pralen in mont en loperasyon resers ek sekour ansanm avek zofisye medikal dan santye Mont Plasir pou al ver Anse Georgette.

Sa i vin apre rapor ki lapolis ti resevwar ki en viziter avek nasyonalite Alman in rankontret serten difikilite pandan letan ki in lo " Trail " anrezilta kot son kondisyon tin agrave e nesesit swen medikal dirzans. In ganny transportre lopital Baie St Anne pou swen medikal pli spesyalize 

En zonm 48 an sorti Capucin dan distrik Anse Aux Pins in ganny rimann andetansyon lapolis ziska le 5 Me 2023 zour ki I ekspekte repas ankour.

Sa zonm I sispe dan en ka kas lakaz e vole kin arive tou resaman dan distrik Anse Aux Pins kot plizyer lekipman eletronik in ganny raporte vole. Serten parmi sa bann lekipman kin ganny raporte vole lapolis in reisi rekipere.

Antretan lapolis I kontinyen avek son lanket dan sa enn ka.

En zonm 37an sorti La Bati in ganny rimann prizon Montagne Posse ziska le 2 Me 2023 apre ki in kas lord e kondisyon ki mazistra tin enpoze lo li tou resaman dan plizyer ka vol.

Sa zonm i sispe dan 2 lensidan separe kin arive lo lans Beau Vallon Dimans le 14 Avril 2023 kot in vol 2 telefonn. 

Antretan Lapolis i kontinyen avek son lanket dan sa 2 ka.

En zonm 34an sorti Union Vale in formelman ganny sarze devan lakour Mazistra Perseverance pou lofans kas batiman e vole kin raporte arive le 16 Avril 2023 dan rezyon Mont Fleuri.

Mazistra in ordonen ki sa aprezan akize i rimann an detansyon Servis Prizon Sesel ziska le 2 Me 2023 zour ki i ekspekte repas ankour.

En madanm 57an sorti Anse Louis, dan distrik Anse Boileau in yer pas devan lakour mazistra Anse Royale kot in ganny rimann 14 zour andetansyon lapolis.

Sa madanm i sispe dan en lensidan met dife dan en lakaz ki ti arive le 16 Avril 2023 Anse Louis.

Antretan lapolis i kontinyen avek son lanket dan sa enn ka. 

4 dimoun in resevwar tretman lopital Sesel apre plitar ganny large an rezilta en aksidan bato lo lanmer dan zanmerant Ile Aurore yer swar.

Lapolis ti ganny alerte lo sa lensidan ver 9er 25 diswar. Sete gard lakot Sesel asiste par lezot propriyeter bato ki ti reponn lapel pou lasistans kot sa bann viktim ti ganny transporte kot baz gard lakot e ganny remet dan lanmen bann zofisye medikal.

En lanket in komanse dan sa en ka pou etablir sirkonstans otour sa lensidan.

En zonm 41an sorti Les Mamelles in ganny anmenn ankour ozordi apremidi kot mazistra in rimann li an detansyon lapolis ziska le 27 Avril 2023.

Sa zonm I sispe dan en lensidan kot en madanm in ganny atake e bate yer Les Mamelles. Sa madanm in admit lopital Sesel e son kondisyon I stab.

En garson 20an ek en lot 22an sorti Mont Fleuri in ganny arete, pas atraver serten prosedir lanket apre ganny large antretan ki lapolis I konplet zot ka pou prosekisyon an relasyon avek lofans ekstorsyon larzan an servan menas.

O moman zot larestasyon tar apremidi le 5 Avril dan rezyon Lavil lapolis ti osi sezi dan zot posesyon larzan ek sibstans ki sispekte drog kontrole hashish. Anplis ki sa enn parmi sa 2 sispe tin donn lapolis en fo non ki egalman I en lofans anba lalwa.

Tou le e 2 sispe pou aprezan retourn kot lapolis le 19 Avril.

En garson 24 an ki reste Dame Le Roi, Baie Lazare in formelman ganny sarze devan lakour Mazistra yer Mardi le 11 Avril pour 3 diferan ka vol osibyen ki pou komet lofans trespas kriminel.

Sa 3 ka kot sa garson ti antre lo propriyete ki pa pou li e vol fri raporte Kordgard Anse Royale ti ariv 22 Novanm 2022, 16 Fevriye e le 3 Avril 2023. Swivan son larestasyon le 7 Avril e ganny sarze le 11, sa akize in ganny rimann Prizon Montagne Posee akoz I pann reisi zwenn serten kondisyon sirtou en kosyon larzan ki I ti bezwen peye pou son liberte provizwar.

Sa akize pou aprezan repas ankor ankour le 25 Avril.