Kominike

Lavi en zonm 71an avek nasyonalite Britanik, ki lo vakans Sesel, in reisi ganny sove dan lanmer Au Cap, ozordi apremidi. 

 

Sa I gras a lasistans ki 3 peser sorti Au Cap, ki tin deswit reakte pour en loperasyon softaz pou esey sekour sa msye ki ti an detres dan lanmer. Anvi kondisyon letan ki ti tre move in fer sa loperasyon softaz enpe difisil. 

 

Lapolis ti ganny alerte lo sa lensidan ver 3er apremidi pour lasistans. Dapre rapor inisyal ki lapolis in ranmase sa viziter tin al fer "Windsurfing " avek detwa koleg o moman sa lensidan ti arive.

 

Lo lapar Komisyoner Lapolis Msye Ted Barbe, lafors lapolis i oule senserman remersye sa 3 peser Msye Laurent Etienne, Paul Balette ek Ronny Balette pour zot lasistans ki zot in ofer ozordi apremidi dan sa loperasyon softaz, e osi bann sivilyen e zofisye lapolis ki tin osi reponn lapel pour lasistans.