Ramick Mussard  aze 29an sorti Roche Bois, La Digue in formelman ganny sarze devan Lakour Mazistra Mahe, dan 1 ka vol, kont etranze, kin arive le 22 Oktob 2025, lo La Digue.

Mazistra in larg Mussard lo sa bann kondisyon swivan; en kosyon 8 mil roupi ki i pour bezwen peye pour son laliberte provizwar, pour pa enterfer avek temwen dan sa ka, pour pa komet okenn lofans similer, pandan letan ki I pour deor lo laliberte provizwar, pour sinny liv Lakour dan kordgard La Digue, 1 fwa par semenn, avan 6er diswar.

Viki Mussard pann reisi akord demann Lakour, pour pey sa kosyon 8mil roupi, in ganny rimann Prizon Montagne Posse, kot si I arive peye, I pour ganny large, e I pour bezwen sivre sa bann kondisyon. Dan sa enn ka lapolis tin reisi rekiper mazorite propriyete ki tin ganny raporte vole.

Eddy Bomboche aze 37an sorti La Passe, La Digue in formelman ganny sarze devan Lakour Mazistra Mahe, dan 2 ka vol, kont etranze, kin arive le 22 Oktob 2025, lo La Digue.

Mazistra in larg Bomboche lo sa bann kondisyon swivan; an total pour tou le 2 ka, en kosyon 20 mil roupi ki i pour bezwen peye pour son laliberte provizwar, pour pa enterfer avek temwen dan sa ka, pour pa komet okenn lofans similer, pandan letan ki I pour deor lo laliberte provizwar, pour sinny en “Bail Bond” 20mil roupi, an total e pou sinny liv Lakour dan kordgard La Digue, 3 fwa par semenn. Mazistra in enpoz menm kondisyon lo sa akize dan dezyenm ka osi.

Viki Bomboche pann reisi akord demann Lakour, pour pey sa kosyon 20mil roupi, in ganny rimann Prizon Montagne Posse, kot si I arive peye, I pour ganny large, e I pour bezwen sivre sa bann kondisyon. Dan sa enn ka lapolis tin reisi rekiper mazorite propriyete ki tin ganny raporte vole.

Sa garson 21an sorti Port Glaud, ki ti andetansyon Lapolis, an koneksyon avek sa 11 yenm ka aksidan fatal, ki ti arive le 18 Oktob 2025, Port Glaud.

In pas devan Lakour Mazistra Ile Du Port, ozordi bomaten, kot lapolis atraver prosekisyon ti pe demann Lakour, ki I ganny garde lo rimann, pour 14 zour, antretan ki lanket I ganny fer dan sa en ka. Mazistra in akord demann prosekisyon e rimann sa sispe andetansyon Lapolis pour 14 zour.

Sa garson 18an sorti Port Glaud, ki ti andetansyon Lapolis, an koneksyon avek en ka vol lo propriyete Lapolis Anse Royale, ki ti arive le 15 Oktob 2025, kot en moter tin ganny vole.

In pas devan Lakour Mazistra Ile Du Port, ozordi bomaten, kot in ganny rimann andetansyon lapolis ziska le 30 Oktob 2025, zour ki I ekspekte repas devan Lakour ansanm avek sa lot 2 sispe dan sa ka.

Trwa zonm ek en Fiy in pas devan Lakour Siprenm ozordi bomaten, kot zot in ganny rimann 11 zour andetansyon lapolis, koman sispe dan serten ka, ki lapolis pe fer lanket ladan, pour lofans leksplwatasyon en miner, rekrite, e abrit en miner avek lentansyon pour  eksplwate e labi seksyel.

Sa I en zonm 60an sorti dan Les Mahe, de zonm aze 26an ek 32an sorti Praslin ek en fiy 18an ki li osi I sorti Praslin.