Ser frer ek ser zofisye Lapolis Sesel e tou nou zabitan enkli viziter ki lo nou bann zil, ozordi, pandan ki nou mark Lazournen Lapolis 2025, nou debout ansanm dan refleksyon e linite. Parey tou bann lannen, nou selebrasyon i osi tonm menm dat avek Lazournen Internasyonal Lape, le 21en Septanm. Ozordi nou ganny fer rapel ki nou devwar konman lapolis i pa zis anver respe pour lalwa, me osi pou mentenir larmoni e protez bann valer ki gard nou pei ansanm.
Sa zour i tonm dan en moman tre enportan pou Sesel. Sa I akoz ki dan zis detrwa zour, ant le 25 a 27 Septanm nou pei pou pe fer son Eleksyon Prezidansyel e Lasanble Nasyonal. Sa eleksyon i reprezant lafors nou demokrasi e konfiyans ki lepep Seselwa i met dan nou konman bann defander lalwa. Konman gardyen lord ek lape, Lapolis Sesel i reafirm son langazman pou asire ki sa prosesis i deroul dan lape, lazistis e dan sekirite. Nou bann gard i aktyelman enpe partou dan pei pe travay dir an deservan zot responsabilite avek profesyonnalism pour asire ki sa eleksyon I deroul byen.
Se pour sa rezon ki sa lannen, nou pa pe kapab komemor sa Lazournen Lapolis atraver bann aktivite ki nou tradisyonelman fer. Me toutmen, mon asire ki lespri sa zour i reste for dan leker sak zofisye lapolis. Lazournen Lapolis i en moman pou nou onor bann zonm ek fanm ki sak zour i donn zot lavi pou servi nou kominote. I osi en letan pou nou pran en poz e reflesir lo bann valer disiplinn, sakrifis e servis ki defini nou profesyon.
Letan nou komemor sa zour, nou panse e lapriyer i al ver nou bann zofisye ki admit lopital. Nou swete ki zot reganny zot lasante e ki byento zot a kapab retourn dan zot pos avek lafors renouvle. Nou osi rapel avek respe ek konpasyon bann zofisye ki’n kit nou pandan lannen, osi byen ki bann koleg ki pe soufer akoz zot in perdi en dimoun pros. Zot sakrifis e zot soufrans i fer nou rapel kouraz ki I pran pou deservi nou pei.
Pour tou zofisye Lapolis Sesel, zot devouman, menm dan moman difisil e sirtou la dan letan kot pei pe pas atraver sa prosesis eleksyon, I enportan ki zot kit antet ki zot travay I depann lo konfyans ki piblik I met dan zot. Ozordi, mon anvoy mon gran remersiman e rekonesans pour zot kouraz, profesyonnalism e fidelite anver nou nasyon.
Pandan ki nou komemor Lazournen Lapolis 2025, annou debout fyer pour sa ki nou ete e nou reprezante. Annou osi anmenn mesaz lape dan nou fanmir, dan nou kominote e atraver Sesel ki nou kontan. Ansanm, an partenarya avek lepep ki nou servi, nou pou kontinyen konstrir en nasyon kot sekirite, linite ek lazistis i reniye.
Ki Bondye I beni zot tou e ki Bondye I kontinyen beni Sesel.
Mr. Ted Barbe
Komisyonner Lapolis Sesel
