Kominike
Chris Marimba aze 32an sorti Belonie, ek Rodney Freminot aze 33an sorti Anse Aux Pins in formelman ganny sarze devan Lakour Mazistra, Ile Du Port an koneksyon avek en seri ka vol.
Chris Marimba, in formelman ganny sarze pour lofans kas lakaz e vole, trespas kriminel e pour an posesyon en zouti ofansiv dan en landwa piblik.
Rodney Freminot li in ganny sarze dan 2 ka, pour lofans kas lakaz e vole, e ilegalman servi en transpor san konsantman son propriyeter.
Mazistra in larg Marimba lo sa bann kondisyon swivan; kot I pour bezwen pey en kosyon 10mil roupi pour son laliberte provizwar, pour pa komet ou ganny sarze avek okenn lofans similer, pandan letan ki I pour deor lo laliberte provizwar, en kouvrefe depi 6er diswar ziska 6er bomaten. Sa bann kondisyon, I aplikab dan tou son bann ka, apart sa kosyon 10mil roupi, ki li I zis dan premye ka. Viki Marimba pann reisi akord demann Lakour, in ganny rimann Prizon Montagne Posse, si I arive fer sa peyman 10mil roupi, I pour ganny large, e I pour bezwen sivre sa bann kondisyon ki Lakour in enpoz lo li.
Dan ka Rodney Freminot, viki semenn pase in fek kondann en term 8mwan Prizon devan Lakour Mazistra Anse Royale, Mazistra in rimann li dan sa enn nouvo ka, ziska dennyen determinasyon dan son ka.
