Crime Stopper and Service Complaints call 133  | For Emergencies Call 999

Central Police HQVictoria, Mahe

Emergency Only 999

Communique

Communique (350)

Lapolis in raporte ki  Rajandy Finesse, sa zonm 23 an sorti distrik Anse Aux Pin ki tin ganny raporte manke depi le 31 Mars e in ganny trouve. Rajandy ti raport son lekor kot CID Bois de Rose tar ozordi bomaten.

Swivan lanket ki lapolis pe fer an relasyon avek son disparisyon 31, lendikasyon I montre ki Rajandy tin ganny kidnap e sa ki tin pran li an kaptivite in large li swivan presyon loperasyon monte par lapolis pou retrouv li.

Lapolis in egalman fer resorti ki  3 zonm, sispe, in ganny anmenn ankour ozordi apremidi an relasyon avek en ka kot Rajandy ti ganny bate e ganny koz dimal grav anviron 3 semenn pase.

Dapre lanket anmennen par lapolis, Rajandy tin ganny bate e brile lo serten parti son lekor le 13 Mars, admit lopital le 16 ziska le 22 Mars e ti pe apre vizit klinik La Rivyer Anglez kot i ti pe kontinnyen resevwar tretman  ziska son disparisyon le 31 Mars.

Sa 3 sispe ki 1 ti ganny arete yer apremidi 2 lezot granmaten ozordi in pas ankour apremidi e ganny rimann pou repas ankour le 16 Avril.

Lapolis i ekspekte fer ankor larestasyon antretan ki lanket i  kontinnyen dan sa ka kidnapping.  

Swivan rapor ki serten kontrakter e endividi pe kontinyelman tir ‘Coral Fill’ dan Zone 4 Perseverance, Lapolis I oule enform manm piblik ki I en lofans pou tir ‘Coral Fill’ dan sa landrwa san ki zot in ganny permisyon avek Minister Labita, Lenfrastriktir e Transpor lo Later  (MHILT) pou ‘ekstraksyon’.

 Swivan sa bann lensidan ki pe kontinyen e menm entansifye  Lapolis in enformen ki I pe al entansifye mezir neseser enkli  tyek dan bann veikil ki pe transport ‘Coral Fill’ lo semen pou verifye ki permisyon atraver let sorti kot Minister  konsernen in ganny donnen konman lotorizasyon formel pou  ‘ekstraksyon’ parey prosedir lalwa I rekonmande.

 Lapolis I remersye manm piblik pour zot korperasyon pou evit okenn kontravansyon.

Lapolis in raporte ki en garson 22an ki reste Roche Caiman in aparet devan Lakour Mazistra Anse Royale yer Lendi le 12 Mars 2018 kot in ganny sarze pou lofans ‘Kase e antre dan en batiman e Vole’ ki I ti komet le 16 Fevriye 2018 ler I ti antre dan Unisey Café Anse Royale pandan lannwit e vol en pake dipen e de bwat fromaz .

Dapre rapor, sa garson ti ganny idantifye par son lanprent ledwa lanmen ki tin reste lo ‘scene’ kot I tin komet lofans.

 Touzour dapre rapor, Lakour in ordonnen ki sa garson I rimann kot ‘Sant Rimann’ Bois de Rose pour sa lofans e osi vi ki komisyon sa lofans in fer ki in kas en kondisyon ki lakour tin deza enpoz lo li swivan en lot lofans ki I tin komet oparavan.

 

Dan en lot ka, raporte par lapolis, en zonm 30an ki reste Val D’en Dor e ki travay konman Gard Sekirite kot UNISEY Anse Royale ti osi aparet devan Lakour Mazistra Anse Royale yer Lendi le 12 Mars 2018 kot Lakour in ordonnen ki I ganny rimannn ziska le 19 Mars 2018 zour ki I pou repas ankor ankour kot I sipoze ganny sarze pou lofans ‘Kas Lakaz e Vole’ ki I ti aparaman komet le 8 Mars 2018 ler I ti antre dan en lakaz Anse Gaulette, Baie Lazare e vol bann lekipman elektronik, telefonn, bizou e lenz.

Swivan lenvestigasyon serten sa bann lobze vole in kapab ganny retrouve.

Dapre rapor lapolis pe osi fer lenvestigasyon dan en ka ‘ Kas Batiman e vole’ ki ti arive le 19 Fevriye 2018 kot en lofis ti ganny kase kot UNISEY pandan lannwit e de laptop mark Toshiba ek ACER e en ‘External’ mark Toshiba ti ganny vole; ki aparaman sa menm sispe I enplike ladan.

 

Dan en ka ‘Vol lo lans’ kot de viziter Alman ti ganny vole zot sak ek lezot lobze personnel; ki ti arive le 9 Mars 2018 lo lans Mare Anglaise, dan distrik Beau Vallon; lapolis in raporte ki en zonm 23an ki reste La Batie Beau Vallon ti aparet devan Lakour Mazistra yer Lendi le 12 Mars 2018 kot I ti ganny sarze e swivan sa Lakour ti ordonnen ki sa akize I ganny large lo en Kosyon 5000 Roupi ziska ki I pou reaparet ankor ankour le 16 Mars 2018.

 Dapre rapor tou bann lobze ki tin ganny vole pandan komisyon sa lofans in kapab ganny rekipere apre ki sa akize tin konfes lofans avek lapolis e swivan lezot prosedir lanket ki ti ganny fer menm zour ki I ti ganny arête.

Lapolis in raporte ki en zonm 40an ki reste Au Cap ti aparet ankour le 18 Zanvye 2018 kot I ti ganny sarze pour en lofans ‘Vole an Servan Vyolans” ki I ti komet le 7 Zanvye 2018 kot I ti tap en zonm 79an dan son figir, pous li e apre vol son telefonn mobil e tay avek.

 Dapre rapor, swivan sa sarz Lakour ti enpoz serten kondisyon lo sa akize ki konpri:

  • En ‘Bail’ 20 Mil Roupi (SR20,000/-)
  • De ‘Surety’ 15 Mil Roupi sakenn (de dimoun pou sinyen lo son par pou fer sir ki I raport ankour sak fwa ki kes I pase e ki I respekte okenn kondisyon ki lakour I kapab enpoz lo li)
  • Pou soumet son Paspor avek Lakour.

 Touzour dapre rapor, vi ki sa akize pan kapab satisfer lakour lo sa de premye kondisyon; I ankor pe rimann Montagne Posee.

 

Dan en lot ka, le 19 Zanvye 2018, en zonm Anse Aux Pins ti ganny anmennen devan Lakour Mazistra Anse Royale kot en mosyon tin ganny mete kont li vi ki I tin kas serten kondisyon ki Lakour tin enpoz lo li an Zilyet 2017 swivan sarz pour en lofans “ Agresyon lo en Zofisye Lapolis”.

Lakour in ordonnen ki sa zonm I ganny rimann dan Prizon Montagne Posee ziska ki son kes ankour I fini konplete.

Lapolis in raporte ki en zonm 31 an ki reste Bougainville Anse Royale ti aparet devan lakour yer Lendi le 15 Zanvye kot in ganny sarze pou de lofans konsekitiv konm swivan: ‘Kas Lakaz e Vole’ ki I ti komet dan mwan Desanm 2017 e ‘Tretman/Menas Vyolans’ ki I ti komet an Zanvye 2018.

Tou le de lofans ti kont menm viktim.

Dapre rapor, sa zonm in ganny sarze pour tou le de lofans me lakour in larg li lo sa bann kondisyon swivan:

  • En ‘Bail Bond’ SR3000/- ki I pou bezwen peye si I pa aparet ankour sak fwa ki son kes I ganny ekoute.
  • Ki antretan ki son kes pe ganny ekoute, I pa komet okenn tel lofans parey

 

Dan en lot ka en zonm 24an ki reste Santa Maria, Anse Royale ti osi pas ankour Lendi le 15 Zanvye kot li in ganny sarze dan en ka ‘Vol’ ki ti arive an Oktob 2017 kot I ti vol en televizyon Flat Screen dan Sant Kominoter Anse Royale.

Dapre rapor sa televizyon ti ganny rekipere par lapolis.

Konzekitivamn sa zonm 24an ti osi ganny sarze pou ‘Konportman Dezordonen dan en Batiman Lapolis’ ki I ti komet an Novanm 2017 dan Kordgard Anse Royale.

Sa menm akize in osi ganny sarze pou lofans ‘Andomaz Propriyete’ ki I ti komet an Zanvye 2018 kot I ti andomaz rakor delo en madanm Santa Maria.

 Dapre rapor, swivan son sarz; lakour in larg sa zonm lo sa bann kondisyon swivan:

  • En ‘Bail Bond’ SR3000/- ki I pou bezwen peye si I pa aparet ankour sak fwa ki son kes I pase

·        Ki antretan ki son kes pe ganny ekoute I pa komet okenn tel lofans parey.

Lapolis in raporte ki sa bato ki aparet dan sa portre avek non LADY A. In ganny raporte perdi par son met Dimans le 13 Zanvye 2018 kot I tin mouye Anse Citron Praslin.

Dapre rapor sa bato ti annan de masin 225 lo la e depi Dimans resers in lanse par lapolis e Gard Lakot pou rod li me ziska prezan I pa ankor ganny retrouve.

Okenn dimoun kin kapab war sa bato ouswa ki annan lenformasyon pou ed lapolis ek son met retrouv li, silvouple kontakte Kordgard Grand Anse Praslin ouswa Kordgard pli pres silvouple.

 

 

Lapolis in raporte ki en zonm ki reste Grand Anse Praslin in ganny anmenn ankour Mardi sa semenn kot in ganny sarze pou lofans ‘Kas lakaz e vole’.

 Sa akize in ganny rimann prizon pou li repas ankour le 22 zanvye  8:30 bomaten.

 

Dan en lot ka raporte par Lapolis, en madanm ki reste Port Glaud in ganny anmenn ankour, ozordi Zedi le 11 Zanvye kot lakour in ordonnen ki I ganny rimann dan en ka ‘ Obtenir Larzan par Fo Pretans’.

Sa sispe pou repas ankour le 19 Zanvye 2018.

Wednesday, 10 January 2018 Communique

Lapolis in raporte ki swivan en ka kot en zonm ti ‘Antre dan en lakaz avek lentansyon pou vole’ ki ti arive le 27 Desanm 2017, sa zonm 31 an sorti dan distrik Mont Buxton ti pas ankour le 8 Zanvye 2018 kot lakour in rimann li Prizon Montany Poze ziska le 22 Zanvye 2018 kot I pou repas ankor ankour.

 

Dan en lot ka ‘Vol avek Vyolans’ ki ti arive lannen pase , kot en madanm Seselwa  ti ganny atake e ganny vole 200 Dolar e 100 Ero, en zonm 19an,  ‘Casual Labourer’ ki reste Belonie in pas ankour le 9 Zanvye 2018 e lakour in rimann li ziska le 16 Zanvye 2018 kan I pou repas ankor ankour.

 

Dan en lot ka kot en zonm ti ganny atrape par de zofisye en Lakonpanyen Sekirite kot Restaurant Golden Plate Roche Caiman le 7 Zanvye 2018, sa zonm 42an ki reste La Louise ti pas ankour le 9 Zanvye e in ganny sarze pou lofans ‘Antre dan en Batiman e Vole’.  Sa zonm pe ansemonman ganny detenir dan Prizon Montagne Posee.

 

Dan sa enn ka, lakour in osi enpoz serten kondisyon lo sa akize ki enkli : En ‘bail’ SR5000/- ki si I peye I pou ganny large e si I ganny large I pou bezwen; pa komet ankor okenn lofans dan sa menm kategori e osi raport kot kordgard Mont Fleuri tou le trwa zour pou siny Liv Lord Lakour.

 

Antretan lanket pe kontinyen dan tou le trwa ka e lezot ka ki sa bann dimoun in kapab enplike ladan.

Lapolis in raporte ki en zonm nasyonalite Ameriken, aze 70an  in raporte noye dan zanmerant Lotel Four Seasons ozordi.

Dapre rapor, se en travayer kot sa lotel ki ti raport sa lensidan avek lapolis dan ver 1132 ozordi bomaten.

Antretan lapolis in lans en lanket dan sa lensidan.

Thursday, 14 December 2017 Communique

En zonm 27 an ki reste La Gogue, sispe dan en lensidan vole an servan vyolans  in ganny arete e anmenn ankour  yer  mardi  apremidi kot in ganny rimann ziska le 22 desanm.

Larestasyon sa sispe ti ganny fer  apre minwi dimans, zis apre ki i tin komet sa lofans.

Viktim sa lensidan ti en endyen 44 an ki ti ganny menase avek en kouto kot pon deryer kot lapos anvil tar dimans swar e ganny vole son telefonn, ‘jacket’ e 45 roupi. 

Sa menm sispe pe egalman fer fas avek lofans posesyon  zouti  ofansif  swivan son larestasyon  vandredi  swar  kot i  tin ganny kestyonnen e ganny large  apre ki lapolis tin sezi en kouto avek li lari bazar.

Sa sispe 27 an i ekspekte ganny sarze zour i repas ankour le 22 sa mwan.

 

 

Dan en zizman rann par lakour siprenm  yer, Daniel ek Dino Monthy in kondann sakenn: 

  • 5,000 roupi  lanmann avek 1 an prizon  sispann pou  2 an pou lofans tretman vyolans.
  • 5,000 roupi lanmann avek 1 an prizon sispann pou 2 an pou lofans andomaz propriyete gouverdman.
  • 3 an prizon sispann pou 2 an pou lofans konportman dezordonnen dan kordgard.

 

Si zanmen Daniel ek Dino pa pey sa 10,000 roupi zot pou al 6 mwan prizon e si zot ganny sarze pou okenn tel lofans mansyonnen dan zizman pandan sa lespas 2 an zot pou al prizon.

 

3 yenm akize dan sa ka, Ronny Appassamy parkont li in kondann 6 mwan prizon  pou lofans tretman vyolans osibyen ki 3mwan pou konportman dezordonnen dan kordgard. Parey santans prizon sispan Daniel avek Dino, sa 2 santans prizon Ronny pou mars ansanm ki vedir i pou fer selamn en term 6 mwan  prizon.

 

Sa zizman en an rezilta lanket dan lensidan ki ti arive dan kordgard Anse Boileau  an Zen 2015. Ou ava rapel ki ti annan antou 5 sispe ki o depar ti ganny arete dan sa zafer. 

 

Jean Toussaint. PRM.

Communiqué Filter

« January 2022 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31