En zonm 27 an sorti ‘dan fatak’ dan distrik Baie Lazare in ganny anmenn ankour kot in rimann pou 14 zour antretan ki lapolis I kontinyen avek lanket dan 2 ka vol kin arive lo lans Lentandans tou dernyenman.

Premye ka ti ganny raporte avek lapolis le 11 zanvye 2022 ver 5:40 apremidi e lot ka yer  le 13 Zanvye ver 6:50 diswar. Toule 2 ka ti ganny raporte kordgard Quatre Bornes dan distrik Takamaka.

Dan sa ka yer swar, mazorite  lobze personnel ki tin ganny raporte vole in ganny rekipere sof larzan.

Sa sispe ti ganny arete yer swar menm par zofisye lapolis avek lasistans en sivilyen dan rezyon lentandans kot sa sispe ti fizikman agres sa zofisye pandan ki ti pe reziste larestansyon.

Swivan konsern kin leve lo kondisyon dan ki leta kaso santral I ete, lo kalite tretman ki bann deteni e rimann pe fer fas avek, prensipalman  an relasyon avek konplent par sa dezyenm akize avek son avoka devan lakour le 07 Zanvye sa lannen e osi rapor soumet par komisyon drwa imen, lapolis pe fer sorti sa kominike pou donn son pwennvi lo sa sitiasyon.

Lapolis I rekonnet ki I annan defayans avek serten son bann fasilite detansyon dan serten son bann stasyon lapolis e ki ansemoman i napa en sant detansyon spesifik zis pou rimann. Avek logmantasyon dan krim e nivo deteksyon kin ogmante, lapolis I vwar li pe arete, deteni e rimann plizyer sispe dan son bann fasilite kot zot bezwen ganny plase dan diferan kaso dan bann stasyon antretan ki lanket I kontinyen ziska zot ganny sarze.

Baze lo rapor komisyon drwa imen e lord lakour dan en ka ki pe ganny ekoute, komisyoner lapolis in fini apwent en komite kat (4) dimoun kin komans visit son bann fasilite detansyon dan bann stasyon e zot in komans soumet rapor e rekomandasyon avek li.

Dario Dubel  aze 30 an sorti Cascade  silvouple kontakte ou paran irzan. Dario in kit lakour son paran Cascade depi le 07 Desanm 2021, ziska prezan son fanmir  pa konnen kote i ete i ti dan en konson demi bwa kouler Nwar mark adidas  e en savat nwar adidas.

Lapolis pe demann nenport endividi ki konnen oubyen annan lenformasyon kote Dario Dubel i kapab ete pou kontakte son sant komann lo 4288000 oubyen kordgard Anse Aux Pins lo 4303737