Kominike Lapolis

Daniel, Batiste Louis-Marie aze 49an ki pa dan en lanplwa sorti Machabee dan distrik Glacis in formelman ganny sarze devan Lakour Mazistra dan 3 ka, pour sa bann lofans swivan; kas lakaz e vole, andomaz propriyete, menas an servan vyolans, lagresyon verbal, e lagresyon fizik lo en endividi.

Mazistra ki ti pe ekout sa ka, in larg Louis-Marie lo sa bann kondisyon swivan; dan premye ka pou sinny en “ Bail Bond ” 10 mil roupi, prodwir 2 dimoun koman en garanti 8 mil roupi sakenn, pou asir son prezans devan Lakour, pou pa entenfer avek temwen dan sa bann ka, pou pa apros ou antre kot rezidans son paran, pou gard en zistans 15 met, pou pa komet ou angaze dan okenn aktivite kriminel, pou sinny Liv Lakour dan kordgard Glacis toule Vandredi,

Dan dezyenm ka, pou sinny en “ Bail Bond ” 6 mil roupi e pou prodwir 2 dimoun koman en garanti 6 mil roupi sakenn, e pou pa apros konplenan dan sa ka ki en miner, e dan 3 yenm ka pou sinny en “ Bail Bond” 3mil roupi e prodwir 2 dimoun koman en garanti, pou asir son prezans devan Lakour, e Mazistra in enpoze menm kondisyon parey dan premye e dezyenm ka kont Louis-Marie.

Louis-Marie pann reisi akord demann Lakour pou prodwir, sa bann endividi koman en garanti dan son bann ka, ki fer I aprezan ganny rimann Prizon Montagne Posse, ziska le 25 Novanm 2024, zour ki I ekspekte repas devan Lakour.

Departman Lapolis