Kominike Lapolis

Samuel Roucou aze 30an sorti Mont Buxton, in formelman ganny sarze devan Lakour Mazistra dan 2 ka, pou sa bann lofans swivan; Menas an servan vyolans, lagresyon fizik lo en zofisye lapolis, reziste larestasyon, enterfer avek louvraz en zofisye lapolis, trespas kriminel e pou sove andetansyon lapolis.

Roucou ti komet sa bann lofans le 14 Oktob 2024, apre ki i antre dan lakour lekol dan rezyon lavil, kot I ti menas en zanfan avek en zouti ofansiv. Sa akize ki ti taye apre son aksyon, ti retourn ankor dan lekol, pandan ki zofisye lapolis ti la e lapolis ti sezi dan son posesyon en lobze. Pandan ki i ti pe ganny arete, Roucou in reziste larestasyon e menas sa zofisye osi avek en zouti.

Mazistra ki ti pe ekout sa ka, in larg Roucou lo sa bann kondisyon swivan, pou pey en kosyon 8 mil roupi pou son laliberte provizwar, ki I pann reisi alor ki fer In aprezan ganny rimann Prizon Montagne Posse. Si Roucou I arive pey sa kosyon 8 mil roupi I pou ganny large me I pou bezwen sivre sa bann kondisyon swivan; pou prodwir 2 dimoun koman en garanti dan son ka, pou pa komet ou ganny sarze avek okenn lofans similer pandan letan ki I pou deor lo laliberte provizwar, sinny Liv lakour 3 fwa par semnn dan kordgard Santral, e pou pa enterfer avek viktim dan sa ka e pou pa apros kot sa lekol.

Departman Lapolis