Lapolis i rod lasistans militer, Interpol e ogmant rekonpans
Dan zot demars pour retrouv Marvin Asba de semenn apre son disparisyon, lapolis in demann Prezidan Danny Faure, ki Komandan an Sef Lafors Defans, pour ki militer i asiste zot dan zot loperasyon ek resers pour retrouv sa zenn garson.
Lapolis in osi lans lapel avek Lapolis Enternasyonal Interpol pour ganny lasistans detektiv enternasyonal pour asiste zot dan zot bann envestigasyon.
Sete Komisyonner lapolis Msye Reginald Elizabeth ki ti donn sa bann lenformasyon lapres lokal yer bomaten.
Komisyonner Elizabeth in osi dir ki lapolis in ogmant sa rekonpans ki zot ti pe ofer pour lenformasyon konkret ki okenn dimoun i kapab fourni sorti 50 mil roupi pour vin 100 mil roupi.
Komisyonner Elizabeth in fer kler ki larzan pour sa rekonpans in sorti dan bidze ki lapolis i gannyen.
Komisyonner Elizabeth in osi dir ki ziska la zot pa ankor ganny okenn lenformasyon konkret lo kote Marvin i kapab ete.
Gard Lakot in osi ganny mobilize pour fer resers lo tou bann lakot.
Antretan Msye Elizabeth in osi lans en lapel tre for avek manm piblik pour fer bann konmanter pli responsab sirtou lo rezo sosyal.
Komisyonner in dir ki lapolis pe ganny plizyer rapor e i annan en lekip detektiv lokalki pe analiz tou sa bann lenformasyon ki pe antre avan pas avek bann zofisye loperasyon sa taskforce ki in osimet anplas avan ki zot anretour zot deplway bann zofisye pour al dan bann landrwa kot sa bann lenformasyon i anmenn zot.
“I enportan alor ki nou ganny plis resours a nou dispozisyon pour nou kapab al dan tou sa bann landrwa apre ki nou ganny lenformasyon pour kontiny nou resers,” Komisyonner Elizabeth in dir.
I ti azoute ki letan zot pou ganny sa bann sipor avek plis mendev lapolis pou kapab fer bann loperasyon konzwent avek militer pour al dan plis landrwa izole kot i ganny soupsyon oubyen okenn lenformasyon.
Lo size sa kantite disan ki ti dekouver pli boner sa semenn Takamaka, Komisyonner Elizabeth i dir i annan en dimoun ki pe ed lapolis dan zot lanket lo la e ki lesantiyon pour fer tes DNA in fini kit pei pour en laboratwar enternasyonal pour vwar si i annan okenn konneksyon avek Marvin.
Msye Elizabeth i dir i’n personnelman spesifye ki sa ka i irzan e ki i bezwen sa rapor o pli vit posib.
Msye Elizabeth in ankor fer resorti ki ziska prezan okenn dimoun pa ankor raport dan okenn lopital pour rod tretman pour okenn gran blesir.
An sa ki konsern lasistans sorti kot Interpol Msye Elizabeth in dir ki osito bann detektiv i ariv dan pei i pou enform manm piblik atraver medya.
Komisyonner in reasir manm piblik ki lanket lapolis pe kontinyen e ki lapolis pe analiz tou lenformasyon ki zot pe gannyen.
