Crime Stopper and Service Complaints call 133  | For Emergencies Call 999

Central Police HQVictoria, Mahe

Emergency Only 999

Communique

Communique (328)

En fermye Takamaka in fer rapor avek Lapolis bomaten konmkwa dimoun in vol anviron 40 a 50 zironmon lo son laferm yer swar oubyen granmaten ozordi dan sa menm distrik.

Sa msye in raporte ki sa bann zironmon pa bon pou konsonmen akoz in fek spray avek pestisid “benlet ek Cyperin 200 EC” yer apremidi apre ki I ti fer en premye doz spray Zedi pase.

Sa fermye pe averti dimoun kin kapab aste zironmon avek sa kalite mark lo la (see picture) pou pa konsonmen akoz I en risk pou lasante.

Lo son kote Lapolis ki pe fer lanket dan sa ka pe demann nenport endividi ki annan lenformsyon kredib lo sa vol pou kontakte kordgard pli pre

Manm piblik  an zeneral, sirtou zabitan distrik Anse Etoile I ganny enformen ki an kolaborasyon avek lotorite ladministrasyon sa distrik, apartir Merkredi le 16 Zen Lapolis pe tanporerman met an operasyonel en lofis (Police post) kot biro ladministrasyon Anse Etoile pou fasilit rapor lensidan e menm asiste avek serten servis ki kordgard Anse Etoile ti pe rann zabitan sa distrik oparavan.

Sa biro I trouve kot  internet Café ti ete kot Sant Sosyal anfas avek kort basket sa distrik.

I pou ouver 24 erdtan e zofisye ki la pou sa lyezon direk avek Stasyon Perseverans ki ansemon osi responsab pou deservi zabitan e distrik Anse Etoile.

 

Pwen kontak sa Police post i  4241948 e 4241810

Letopsi fer lo lekor en zonm 52 an ki ti ganny trouve mor dan lakaz  kot I ti pe travay e reste lo Praslin yer bomaten in demontre ki lakoz son lanmor ti an rezilta plizyer konplikasyon medikal serye, parmi tansyon o e osi problenm leker. Sa zonm, msye Augustin Perrine ti en zabitan Cascade ki ti pe travay koman sekirite  kot OASIS, en letablisman touristik dan distrik Grand Anse.

Sete enn son koleg travay ki ti dekouver li mor dan lakaz pou anplaye sa letablisman ver 7:50 bomaten.

Dapre en lot koleg, dernyen fwa ki I ti trouv Msye Perrine vivan ti mardi bomaten, menm zour ki patolozis in estimen Perrine tin kapab mor.

En zonm 28 an ki reste  St Louis in formelman ganny sarze sa semenn pou kase, antre e vole dan en batiman dan sa menm distrik mwa pase. Lakour in ordonnen ki sa akize I ganny rimann prizon montanny Posee me I kapab ganny large si I pey en kosyon 12,000 roupi ki enn bann kondisyon kin ganny enpoze lo li.

Lezot kondisyon enpoze par lakour I pou sinny liv lakour kot kordgard Santral 3 fwa par semenn e I pa devret okenn par ant 6er diswar a 6er bomaten apard ki kot lakour son manman. Ziska ler sa akize pakor pey sa 12,000 roupi alor I ankor rimann prizon

En zonm 39 an ki reste Anse Dejeuner in ganny trouve mor, prezimen pann ver 1er ozordi apremidi Anse Dejeuner enpe dan montanny anviron 200 a 300 met zistans avek lakaz son manman.

Dapre son manman, son garson tin kit  lakaz depi dimans apremidi  e lapel par lapolis pou li etablir kontak avek son fanmiy tin fer yer swar swivan rapor son labsans fer kordgard Anse Aux Pins yer 4:45 apremidi.

Lapolis pe fer lanket dan sa ka atandan rezilta letopsi pou determin ekzat lakoz son lanmor.

An relasyon avek tel lensidan lanmor, lapolis I dir ki rezilta letopsi fer lo lekor sa msye 56 an Providenec semenn pase ti  konsistan avek ler en dimoun in pann.

Finalman, I annan sa zonm franse kin ganny sarze resaman pou mert kin repas ankour ozordi. Lakour in ordonnen ki I reste lo rimann. Sa I dan ka sa madanm franse 32 an lo Ste Anne ki rezilta letopsi ti montre ki I pa tin pann me plito ganny trangle.

Tuesday, 01 June 2021 Communique

Lapolis in raporte ki in komans lanket dan lensidan kot en zonm 56 an ki travay pour lakonpannyen Wastea in ganny dekouver prezimen pann deryer en pti lakaz kot sa ki paret en garaz Providence dan zanmerant lakonpannyen ex-Star Seychelles.

Dapre rapor sa zonm ki en zabitan Anse Aux Pins ti veye e osi reste dan sa landrwa ki propriyete en lot msye.

Lekor sa zonm ti ganny dekouver ver 1:00 er par zofisye lapolis ki tin al fer serten travay dan sa zanmerant.

Dapre patolozis, I kapab annan 3 a 4 zour ki sa zonm in mor.

Lapolis pe esper rezilta letopsi pou essey determin sirkonstans e lakoz ekzakt son lanmor.

Lapolis in raporte sa zonm franse, sispe dan lanmor son partener 32 an, raporte arive kot zot ti pe pas vakans Club Med lo Zil Ste Anne le 27 Avril in formelman ganny sarze devan lakour siprenm yer Merkredi pou lofans mert.

 Ziz lakour siprenm in ordonnen ki sa akize I reste lo rimann an detansyon lapolis pou li repas ankour le 8 Zen.

An relasyon avek kominike konzwent Gard lakot ek Lapolis Sesel sorti yer swar dimans le 23 Me, sa 3 seselwa avek 4 endonezyen kin ganny arete lo bato lapes BABA ALI in pas devan lakour Siprenm ozordi apremidi kot zot in ganny rimann pou 14 zour.

 Sa 7 endividi pe ganny prosekite pour lofans trafik, lenportasyon osibyen ki pou konplote pou lenportasyon e trafik drog kontrole.

 Lofans mete kont sa 7 sispe i vin apre ki tes preliminer fer lo sibstans dan pake sispe ki zot tin zet dan lanmer ki zofisye gard lakot ti reisi ranmase ti kontyen drog kontrole Hashish ek Heroin estimen pou en valer 20 milyon roupi sesel.

 

Lanket dan sa ka i kontinnyen.

 

Lapolis in raporte ki sa 22 Pakistane ki ti abor sa 2 bato “dhow” ki ti ganny trouve dan  Zone  Ekonomik Ekskliziv Sesel le 4 May e plitar ganny entersepte e eskorte Mahe pou lenvestigasyon in repas ankour ozordi e zot in  ganny large san kondisyon.

En frer dan son 20 tenn lannan in ganny anmenn devan lakour siprenm Mardi sa semenn koman sispe pou lofans labi seksyel lo son pti frer ki ankor miner.

 Sete lotorite Servis Sosyal ki ti enform lapolis lo sa ka semenn pase apre ki zot manman tin raport sa lensidan boulversan avek sa lotorite.

 Younit “Child Protection” dan Lapolis pe kontinny lanket dan sa ka.

 Apre pas ankour Mardi, Ziz lakour siprenm I larg sa sispe lo serten kondisyon tel ki pey en kosyon 10,000 roupi, sinny en lot kosyon 25,000 roupi, pou li pa kit sessel, pou pa enterfer avek son viktim e osi temwyen dan sa ka.

Lezot kondisyon I pou kit sa lakour, pa vin dan landrwa kot son viktim I reste, pou pa komet en lot tel kalite lofans e finalman pou sinny liv lakour kot lapolis tou le semenn.

 Swivan sa lensidan, bann lotorite konsernan pe ankor enn fwa lans lapel for avek tou paran dan sesel pour vin pli vizilan e atantif pou konpran e konnen ki pe pase dan zot lakour an relasyon avek nenport form labi sirtou labi seksyel.

 Nenport sitwayen ki konn ka ki pe arive pe ganny pe ganny konseye pou alert lotorite konsernen.

En zonm 35 an, konpanny sa madanm franse ki tin raporte  prezimen pann Club Med lo zil  Ste Anne le 27 Avril in ganny arete koman sispe dan ka son lanmor.

Sa sispe ti ganny arete yer Mardi e  ganny anmenn ankour ozordi kot in ganny rimann pou repas ankour le 12 Me.

Lapolis pe antretan kontinnyen avek son lanket.

Communiqué Filter

« November 2021 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30